USD
АСТАНА. 14 тамыз. Денсаулық сақтау министрлігінің бақылауды күшейтуі нәтижесінде Қазақстанда тамақтан улану жағдайлары төрт есеге дейін кеміп отыр. Бұл туралы Денсаулық сақтау министрлігі баспасөз қызметінің дерегіне сүйенген rast.kz хабарлайды.
Республикада 2026 жылдың жеті айында білім беру нысандарына байланысты тіркелген тамақтан улану жағдайларының саны төрт есеге төмендеді. Мұндай нәтижеге Мемлекет басшысының тапсырмасын орындау аясында балалар болатын нысандарға мемлекеттік бақылауды күшейту нәтижесінде қол жеткізілді.
2025 жылдың жеті айында 8 жағдай тіркеліп, 118 бала зардап шеккен болатын. Ал 2026 жылдың осы кезеңінде 2 жағдай ғана орын алып, 13 бала зарарлыққа ұшырауы есепке алынды.
Маңғыстау облысындағы білім беру нысандарында тамақтан уланумен байланысты топтық ауру жағдайларынан кейін мемлекет балалардың денсаулығын сақтауға бағытталған қосымша шаралар кешенін қабылдады.
2025 жылғы 4 желтоқсанда Мемлекет басшысы мемлекет бюджетінен қаржыландырылатын балалар нысандарына мемлекеттік бақылаудың ерекше тәртібін көздейтін Заңға қол қойды. Жаңа тетік 2026 жылғы 1 ақпаннан бастап қолданысқа енгізілді.
«Бұл балалар болатын нысандарда санитариялық талаптардың сақталуына бақылауды күшейтуге және ықтимал қауіптерді уақтылы анықтауға мүмкіндік берді», – делінген хабарламада.
2025 жылғы 1 қыркүйектен бастап білім беру ұйымдарында тамақтану стандарты және бірнеше нұсқадан тұратын үлгілік перспективалық мәзір қолданылып келеді.
Құжаттар балалардың дұрыс әрі теңгерімді тамақтануының заманауи қағидаттарын ескере отырып әзірленеді. Бұл ретте өнімдердің қауіпсіздігіне, оларды сақтау және дайындау жағдайларына ерекше назар аударылады.
«Балалардың қауіпсіздігі – мемлекеттің сөзсіз басымдығы. Мемлекет басшысының тапсырмасын орындау үшін балалар болатын нысандарға бақылауды күшейтіп, мектептегі тамақтануды ұйымдастыруға қойылатын талаптарды арттырып жатырмыз. Біздің міндетіміз – бұзушылықтарға жауап беріп қана қоймай, қауіптердің алдын алу. Баланың сырқаттануының бір ғана жағдайының өзі тексеру жүргізуді және қажетті шараларды қабылдауды талап ететінін айта кету керек», – делінген министрлік нұсқауында.
Санитариялық-эпидемиологиялық қызметтің өңірлермен және білім беру ұйымдарымен бірлескен жұмысы жалғасуда.
«Балалардың қауіпсіздігі, мектептердің санитариялық-эпидемиологиялық саламаттылығы және мектептегі тамақтанудың сапасы мәселелері – Денсаулық сақтау министрлігінің тұрақты бақылауында», – делінген хабарламада.
