USD
ҚЫЗЫЛОРДА. 11 тамыз. Қызылорда облысы полиция департаментінің қызметкерлері демалыс күндері қоғамдық қауіпсіздікті қамтамасыз ету және құқық бұзушылықтардың алдын алу мақсатында күшейтілген режимде қызмет атқарды. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Күшейтілген режим барысында полицейлер қоғамдық орындарда тәртіпті қамтамасыз етіп, құқық бұзушылықтардың алдын алу бойынша профилактикалық және рейдтік іс-шаралар жүргізді.
Нәтижесінде Қазақстан Республикасының Әкімшілік құқық бұзушылық туралы кодексінің бірқатар баптары бойынша 464 әкімшілік құқық бұзушылықтың жолы кесілді. Атап айтқанда, ҚР ӘҚБтК-нің 127-бабы бойынша кәмелетке толмаған адамды тәрбиелеу және оған білім беру, оның құқықтары мен мүдделерін қорғау, қауіпсіздігін қамтамасыз ету жөніндегі міндеттерді орындамаудың 20 дерегі анықталды. Бұдан бөлек, ҚР ӘҚБтК-нің 132-бабы бойынша кәмелетке толмағандардың түнгі уақытта ойын-сауық мекемелерінде болуына жол берудің 1 дерегі тіркелді.
Ал 442-бап бойынша кәмелетке толмағандардың заңды өкілдерінің еріп жүруінсіз түнгі уақытта ойын-сауық мекемелерінде немесе тұрғынжайдан тыс жерде болуы бойынша 196 дерек анықталды. Сонымен бірге 434-1-бап бойынша 10, 434-2-бап бойынша 38 әкімшілік құқық бұзушылықтың жолы кесілді. Бұған қоса, 200-бап бойынша алкоголь өнімін өткізу жөніндегі талаптарды бұзудың 8 дерегі анықталса, 437-бап бойынша тыныштықты бұзудың 91 дерегі тіркелді. Алкогольдік ішімдіктерді ішу немесе қоғамдық орындарға масаң күйде келу фактілеріне қатысты 440-бап бойынша 100 әкімшілік құқық бұзушылық анықталды.
Қызылорда облысы полиция департаменті қоғамдық тәртіпті сақтау, азаматтардың қауіпсіздігін қамтамасыз ету және құқық бұзушылықтардың алдын алу бағытындағы жұмыстарды тұрақты түрде жалғастырады.
