USD
ТАЛҒАР. 31 шілде. Талғарда өзінің зорланғанын айтып, арызданған қыздың шағымына жүре қараған полиция қызметкері сот жүзінде жазаға тартылды. Бұл туралы Orda.kz ақпарына сілтеме жасаған rast.kz хабарлайды.
Алматы қалалық адвокаттар алқасының адвокаты Гүлмира Сембаеваның бүгін полиция қызметкері Мақпал Мұсабайға қатысты сот үкімі жарияланып, оның сот залынан қамауға алынғанын баяндады. Ал онымен бірге айыпты деп танылған келесі полицей – Хамитовқа іздеу жарияланған.
Сот Мақпал Мұсабайды Қылмыстық кодекстің 370-бабы 4-бөлігінің 1-тармағы («Қызметтегі әрекетсіздік») және 362-бабы 4-бөлігінің 3-тармағы («Билікті немесе лауазымдық өкілеттіктерді асыра пайдалану») бойынша кінәлі деп тапты. Қылмыстық құқық бұзушылықтардың жиынтығы бойынша оған бес жыл бас бостандығынан айыру жазасы тағайындалды. Үкім жарияланғаннан кейін айыпталушы бірден қамауға алынды. Оған сондай-ақ өмір бойы мемлекеттік қызметте және белгілі бір лауазымдарды атқаруға тыйым салынды. Бұдан бөлек, әскери атағынан, капитан шенінен айырылды.
Ал Хамитовқа қатысты үкімді жариялау 28 шілдеге жоспарланған еді. Алайда ол сотқа келмегендіктен, отырыс кейінге қалдырылған.
Келесі күні сот тергеуі қайта жалғасып, мемлекеттік айыптаушы Хамитовқа қатысты қылмыстық істі жеке өндіріске бөлуді және оған іздеу жариялауды сұраған.
Прокуратураның мәліметінше, 27 шілде күні кешке Хамитов Қазақстаннан шығып, мемлекеттік шекараны кесіп өткен. Алдын ала ақпарат бойынша, Түркияның Анталья қаласына ұшып кеткен.
Осыған орай Хамитовқа қатысты қылмыстық іс жеке өндіріске бөлініп, оған іздеу жарияланды. Сонымен қатар бұлтартпау шарасы сырттай қамауға алу түріне өзгертілді.
«Оған Қазақстан Республикасы Қылмыстық кодексінің 362-бабы 4-бөлігінің 3-тармағы бойынша айып тағылып отыр. Аталған баптың санкциясы бес жылдан он жылға дейін бас бостандығынан айыру жазасын көздейді. Сондықтан сот оны кінәлі деп таныған жағдайда, судья осы мерзім шегінде жаза тағайындайды. Оған қатысты іс бойынша сот талқылауы тек ұсталып, сотқа жеткізілгеннен кейін ғана жалғасады. Іс соттың қарауына сол кезде жолданады. Қазіргі уақытта үкім тек Мұсабаеваға қатысты шығарылды»,
деді Гүлмира Сембаева.
