USD
БЕРЛИН. 30 мамыр. Германия Ресейдің Румынияда құлаған дронына орай НАТО мен Еуроодаққа көрсеткен доғынан өздерінің ыға қоймайтындарын мәлімдеді. Бұл туралы The Moscow Times ақпарына сүйенген rast.kz хабарлайды.
Германия Сыртқы істер министрі Йоханн Вадефул Ресейдің Румынияда құлаған дронына байланысты НАТО мен ЕО-ның енді «бірлесе жауап» қайтаратынын атап өтті.
«Мәскеу Батысты мұндай қоқан-лоққыларымен әсте қорқыта алмайды», деді Германия министрі Румынияның Галац қаласындағы тұрғын үйге соққан РФ дронына байланысты оқиғаға түсіндірме бере тұрып. Ол НАТО мен Еуропа одағы Мәскеудің «ойсыз» әрекеттеріне жауап дайындап жатқанын баяндады.
«Бізді ешкім қорқыта да, бөліп жібере де алмайды. Біз Ресейдің бұл әрекеттеріне бірлесе жауап қайтарамыз. Біздің барлық ынтымақтастығымыз – НАТО-дағы одақтастарымызбен және ЕО-дағы әріптестерімізбен, Румыниямен бірге», – деді Вадефул Нью-Йорктегі БҰҰ-ға сапары кезінде. Оның айтуынша, бұл жағдай Ресей Федерациясының «ойсыз» әрекеттері бүкіл Еуропадағы азаматтардың қауіпсіздігіне қауіп төндіретінін көрсетті.
Еске сала кетейік, 29 мамырға қараған түні Румынияның Украинамен шекарадағы Галац қаласындағы көп қабатты үйіне Ресейдің атып түсірілген дроны келіп соқтығысты. Солдарынан жарылыс орын алып, өрттен екі адам, оның ішінде жасөспірім зардап шекті.
Осыдан кейін Бухарест Ресей Федерациясының Констанцадағы бас консулдығын жауып, бас консул Андрей Косилинді елден шығарып жіберетінін мәлімдеді.
Сосын Ресей Сыртқы істер министрлігі бас консулдықтың жабылуына Кремль тарапынан берілетін жауаптың көп күттірмейтінін айтып, доқ көрсетті. Ведомство өкілі Мария Захарованың айтуынша, Батысқа Украина Қарулы күштерінің Старобельскідегі (ЛНР) колледжге берген соққыларынан жұрт назарын басқа жаққа аудару үшіг осы оқиға керек болған. Президент Владимир Путин өз тарапынан, егер барлық материалдар берілсе, Мәскеу оқиғаны «объективті тексереді» дегенді айтты.
