USD
ҚЫЗЫЛОРДА. 12 мамыр. Қызылорда облысының әкімі Мұрат Ергешбаев Қорқыт ата мемориалдық кешенінде ел ағаларымен кездесу өткізді. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Қызылорда облысына әкім болып тағайындалғаннан кейінгі бірінші жұмыс сапарын Қармақшы ауданынан бастаған Мұрат Ергешбаев ежелден бергі қасиетті мекен, күллі түркі дүниесі абыз тұтатын киелі жер – Қорқыт баба мәңгіге дамылдап жатқан аумаққа аялдады. Ол осындағы мемориалдық кешенде Сыр бойының ел ағаларымен, зиялы қауым өкілдерімен және ардақты ардагерлермен кездесті.
Аймақ басшысымен кездесуге Қазақстанның Еңбек Ерлері Абзал Ералиев, Имамзада Шағыртаев, облыстық мәслихат төрағасы, мемлекет және қоғам қайраткерлері, облыстық, аудандық ардагерлер кеңесінің төрағалары қатысты.
Кездесуде аймақ басшысы ақсақалдардың ел бірлігі мен қоғамдық келісімді нығайтудағы рөліне тоқталып, аға буынның өмірлік тәжірибесі мен ой-пікірлері қашанда маңызды екенін атап өтті. Сонымен қатар, ел ағаларының ұсыныстары мен ақыл-кеңестері әрдайым ескерілетінін жеткізді.
Ардагерлер облыс басшысының алдағы істеріне сәттілік тілеп, алғашқы қадамды жиналыстан емес, киелі орыннан, тағылымды кездесуден бастағанына ризашылық білдірді.
Осы сапар Мұрат Нәлқожаұлы Марал ишан кесенесіне де арнайы ат басын бұрып барып, ондағы атқарылған жұмыстармен және қазіргі жағдайымен танысты.
Айта кететін жайт, Қармақшы ауданының орталығы – Жосалы кентінен шығысқа қарай 18 шақырым жердегі кесененің төлқұжаты облыстық бюджет есебінен жаңартылып, қорғау тақтасы орнатылған. Ол жергілікті маңызы бар микросакралды киелі орындар тізіміне енгізілді. Ал 2018 жылы аудандық бюджет есебінен жаңғыртылып, облыстық бюджет қаржысына 3D форматтағы интерактивті карта әзірленген.
Тағы бір айта кететін нәрсе, 2024 жылы облыстық бюджеттен 252,3 млн теңге бөлініп, 6,5 шақырым «Жалағаш – Жосалы – Марал ишан» автомобиль жолы жөнделген болатын.
