Мәскеу мен Бейжің соғыста Тегеранға көмек көрсетуі мүмкін – CNN
БЕЙЖІҢ. 7 наурыз. Ресей мен Қытай Иранға АҚШ пен Израильге қарсы соғыста көмек көрсетуге мүдделі болып отыр. Бұл туралы CNN ақпарына сүйенген rast.kz хабарлайды.
Телеарнаның хабарлауынша, Ресей Иранға Америка әскерлерінің, кемелері мен ұшақтарының орналасқан жері мен қозғалысы туралы барлау ақпаратын беріп жатыр. Басылымның АҚШ барлау есептерімен таныс бірнеше дереккөзге сілтеме жасай отырып, баяндаған мәліметтері осыны көрсетеді.
The Washington Post газеті бұған дейін Ресей барлау қызметі Иранға Таяу Шығыстағы Америка инфрақұрылымын дәл нысанаға алуға көмектесетінін хабарлаған.
Соғыс басталғаннан бері Иранның АҚШ күштерін анықтау мүмкіндігі төмендеді, бұл Мәскеуден келетін ақпаратты ерекше құнды етті. Қақтығыс басталғаннан бері Иран американдық нысандарға мыңдаған дрондар мен жүздеген зымырандар ұшырды. Кувейттегі бір соққы алты АҚШ әскери қызметшісін өлтірді.
Сонымен қатар, CNN хабарлауынша, АҚШ-та Қытайдың Иранға қаржылық көмек, қосалқы бөлшектер мен зымыран компоненттерін беруге дайындалып жатқаны туралы барлау ақпараты бар. Дегенмен бұл мәселемен таныс үш дереккөз, Бейжіңнің әзірге соғыстан бойын аулақ ұстап отырғанын алға тартады.
Қытай Иран мұнайына қатты тәуелді және бұрын хабарланғандай, Тегеранға кемелердің Ормуз бұғазы арқылы қауіпсіз өтуін қамтамасыз ету үшін қысым жасауда. «Қытай қолдау көрсетуде сақтықты ұстанады. Олар соғыстың біткенін қалайды, себебі бұл олардың энергетикалық қорларына қауіп төндіреді», – деп атап өтті бір дереккөз.
АҚШ қорғаныс министрі Пит Хегсет Пентагонның барлық байланыстарды бақылап, қабылданбайтын әрекеттердің алдын алып жатқанын мәлімдеді, сондай-ақ Ресей мен Қытайдың Иранға көмектесетіндері әлі басы ашық мәселе екенін қосты.
