Бектенов: МӘМС-тегі жемқорлыққа кінәлілер жауапқа тартылады
АСТАНА. 21 қаңтар. Үкімет басшысы Олжас Бектенов Міндетті әлеуметтік медициналық сақтандыру қорын (МӘМС) талан-таражға салғандар түгел жауапқа тартылатынын атап өтті. Бұл туралы malim.kz ақпарына сүйенген rast.kz хабарлайды.
Премьер-министр бүгін өткен Үкімет отырысында Медициналық сақтандыру қорының ақпараттық жүйесі 1 шілдеге дейін Денсаулық сақтау министрлігінің жүйесіне интеграциялануы керек екенін айтты.
«Мемлекет басшысы Әлеуметтік медициналық сақтандыру қорын Қаржы министрлігінің қарамағына беру туралы Үкіметтің шешімін қолдады. Тиісті тексерулер басталып кетті. Кінәлі адамдар жауапқа тартылады. Медициналық сақтандыру қорының ақпараттық жүйесі осы жылдың 1 шілдесіне дейін Денсаулық сақтау министрлігінің жүйесіне интеграциялануға тиіс. Бұл қаражатты пайдаланудың ашықтығы мен тиімділігін қамтамасыз етеді», – деді Олжас Бектенов.
Премьер-министр Президент Қасым-Жомарт Тоқаевтың кеше Қызылордада өткен бесінші Ұлттық құрылтайда Үкіметке берген тапсырмалары тиісті деңгейде орындалуын тікелей өзі бақылайтынын ескертті.
«Әріптестер, Мемлекет басшысының барлық тапсырмалары елімізді ауқымды жаңғыртудың бірыңғай ұзақмерзімді стратегиясымен үндесіп жатыр. Оларды жүзеге асыру барлық құрылымдардың нақты әрі үйлесімді жұмысына байланысты», – деді Премьер-министр.
Еске сала кетейік, Құрылтайда сөйлеген сөзінде Мемлекет басшысы Әлеуметтік медициналық сақтандыру қорының жұмысын жан-жақты тексеру барысында көптеген заң бұзушылықтар мен қызмет бабын асыра пайдалану жайттары анықталғанын атап өтті. «Мемлекеттен қыруар қаржы жымқыру үшін көпе-көрнеу жалған деректер ұсынылған, өтірік мәліметтер енгізілген.
Бүкіл ел экономикамызды өркендетіп, инфрақұрылым жобаларын жүзеге асыру үшін бар күш-жігерін жұмылдырып, денсаулық сақтау саласын дамытуға қаржысын жұмсап жатса, әлеуметтік салаға бөлінген орасан зор қаражат талан-таражға түсуде», – деді Қасым-Жомарт Тоқаев.
