USD
ПЕТРОПАВЛОВСК-КАМЧАТСК. 5 тамыз. Ресейдің Камчатка түбегіндегі Седанка деген елді мекенінде бірде-бір еркеккіндікті қалмапты, себебі бәрі әскер қатарына алынған екен. Бұл туралы «Новая газета Европа» ақпарына сүйенген rast.kz хабарлайды.
Аталмыш селоның 224 тұрғынының 39-ы майданға аттанған. Онда шын мәнінде еркек атаулы қалмаған. Село тұрғындары түгел әйелдер мен жас балалардан, сондай-ақ бірлі-жарым қарт кісілерден құралған.
Камчаткадағы Тагиль округінің Седанка елді мекені Ресейде бірінші болып «Жауынгерлік даңқ селосы» атағын алғалы жатқан сияқты. Өлке губернаторы Владимир Солодовтың айтуынша, ол бұған «арнайы операцияға сіңірген ерекше еңбегі үшін» қол жеткізбек көрінеді.
«Шағын ғана елді мекеннен 39 ер кісі Отанды қорғауға қатысты. Мұндағы әр отбасында ерліктің тарихы тіршілік етіп жатыр […]. Мен бұл шешімнің әрбір камчаткалықтың жүрегінен орын алатынына сенімдімін», – дегенді қосты ол.
Солодов сондай-ақ биліктің өткен жылы арнайы соғыс операциясына қатысушылар тұратын баспаналарды жөндеуге қаржы бөлгенін мәлімдеді. Ал биыл, оның айтуынша, бірнеше пәтерге күрделі жөндеу жүргізілмекші.
Седанка селосы Камчатканың солтүстік-батысында орналасқан, ол іс жүзінде сыртқы әлемнен оқшауланып қалған, мұнда жұрт тек қысқы мұз қатқан жолмен ғана келе алады. Селода Камчатканың қазір саны күрт азайып қалған байырғы халқы – коряктар тұрады.
2024 жылы Kamchatka Life ресурсының журналистері Седанкаға арнайы келіп көріп, оны бұған дейін өздері болған жерлердегі «ең қатты депрессияға ұшыраған нүкте» деп атады. Басылым сонау совет заманында тұрғызылған көп пәтерлі үйлердің басым бөлігінде су да, әжетхана да жоқ екенін, ал тұрғын үй қорын саңырауқұлақтар басып қалғанын жазды.
«Мұндағы жұрт дәстүрлі тұрмыс салтын жүргізбейді, тіпті оған талпынбайды да, олар өлместің күнін жалдап отыр», – делінген таблоид репортажында.
Журналистер сондай-ақ жергілікті үкіметтің мәліметі бойынша Седанкаға 457 адам тіркелгенімен, іс жүзінде онда бар-жоғы 224 адам тұратынын атап көрсетті Ал еңбекке жарамды еркек тұрғындардың барлығы қазір арнайы соғыс операциясында жүр.
Седанканың басынан өткен тарих импершіл Ресей билігінің Украинамен соғысты пайдаланып, федерация құрамындағы осындай аз санды халықтарды ең алдымен жоқ қылып жіберудің саясатын ұстанып отырғанын аңдатады. «Арнайы соғыс операциясына» әу басынан көптеп қатыса бастаған халықтар арасында буряттар мен қалмақтардың, татарлар мен башқұрттардың, алтайлар мен тывалардың, қазақтар мен якуттардың, дағыстандықтар мен шешендердің үлес салмағы көп екені көптен айтылып келеді. Пайыздық мөлшерге келгенде орыстардың саны дәл бұлардай жоғары емес.
Суретте: Седанка селосы
