ҚазҰУ студенті ректораттың 14-қабатынан жерге секіріп, қазаға ұшырады
АЛМАТЫ. 31 шілде. Әл-Фараби атындағы Қазақ ұлттық университетінің 1-курс студенті ректорат ғимаратының 14-қабатынан секіріп, жантәсілім еткен. Бұл туралы Orda.kz ақпарына сүйенген rast.kz хабарлайды.
Қайғылы жағдай 30 шілде күні күндіз болған. Портал мәнбесінің мәліметінше, «Шығыстану» факультетінің «Түркология» мамандығында оқитын студент мұндай оқыс қадамға оқудан қалу немесе оқу ақысын төлеу мүмкіндігінің болмауы себебінен баруы ықтимал.
Сайт мәнбесі сондай-ақ кеше университет әкімшілігі оқиға туралы ақпараттың сыртқа таралып кетпеуі үшін қызметкерлердің телефонында фото немесе видео бар-жоғын тексеріп шыққан.
«Кешкі сағат 18:00-ге дейін ректораттың есігі ішкі жағынан жабылып, сырттан ешкім кіргізілген жоқ. Жұмысшылардың телефондарын да тексеріп жатты», – деді мәнбе.
Алматы қалалық полиция департаментінің болжамынша, студенттің бұл әрекетіне отбасылық қиындықтар түрткі болуы мүмкін.
«Бостандық ауданының полиция басқармасы Қылмыстық кодекстің 105-бабы бойынша іс қозғады. Оқиғаның мән-жайы мен себептері анықталуда», деп хабарлады ведомство.
