Трамп Украинадағы соғыс жайлы: Путин бізге сандырақтап отыр
УАШИНГТОН. 9 шілде. АҚШ президенті Дональд Трамп Ресей диктаторын Украинадағы соғысты тоқтату хақында бізді ылғи бос сөзбен тойдырып бітті дегенді айтты. Бұл туралы DW ақпарына сүйенген rast.kz хабарлайды.
Ақ үйдің алпауыты өзінің әріптесі санап келген Кремль қожайынынан көңілі қалғаны сондай, оны «сандырақты көп айтты» деп айыптады. Ол осының орайында АҚШ-тың қорғаныс қаруларын Киевке жіберуді мақұлдағанын растады.
АҚШ президенті Дональд Трамп шілденің 8-і, сейсенбі күні Ресей узурпаторы Владимир Путинді осы кезге дейін Украина турасында кіл бос сөз айтып келді деп кінәлады. «Уашингтон бір күн бұрын Киевке өзін-өзі қорғау үшін қосымша қару-жарақ жіберуге уәде берген болатын», деп баяндады «Франс Пресс» агенттігі.
«Шынымды айтсам, біз осы кезге дейін Путиннен сандырақ сөздерді көп естіп келдік. Ол әрдайым жарқын жүзді болып көрінгісі келеді, бірақ мұның артында ылғи былшылдаған бос сөздер тұрады», – деді Трамп Ақ үйде журналистерге. Трамп Путинге «мүлде риза емес» екенін тағы қайталады, өйткені олардың өткен аптада телефон арқылы сөйлесуі де Украинаға қатысты бітімгершілік келісімге келуге ілгерілеушілік әкелген жоқ. Қайта содан кейінгі түні Мәскеу Киевті атқылауды бұрын-соңды болмаған дәрежеге жеткізді.
Америка мемлекетінің басшысы Сенатта Ресейге қарсы қосымша санкциялар енгізу туралы ұсынылған заң жобасына да түсіндірме берді. «Мен бұған өте байыпты қараймын», – деді ол.
«8 шілдеде өткен Министрлер кабинетінің отырысында Дональд Трамп Украинаға америкалық қорғаныс қаруын жіберуді мақұлдағанын айтты», деп хабарлайды Reuters.
