USD
УАШИНГТОН. 19 ақпан. АҚШ президенті Дональд Трамп Украина лидері Володимир Зеленьскийді «сайланбаған диктатор» деп келеке етті. Бұл туралы The Voscow News ақпарына сүйенген rast.kz хабарлайды.
Дональд Трамп Сауд Арабиясында өзара келіссөз жүргізген АҚШ пен РФ делегацияларының шешімдерін керек етпейтінін мәлімдеген Володимир Зеленьскийге бүгін бірден жойқын шабуыл жасады. Ол осыған қатысты жынын Truth Social әлеуметтік желісіне төгіпті.
«Біз өзіміздің қатысуымызсыз өткен Украинаға қатысты қандайда бір бөлек келісімді мойындай алмаймыз», – деген еді ол 17 ақпан күні.
Өздеріне деген мынадай қатынас шымбайына қатты батып кеткен Трамп сосын оқалақ тиген сиырдай мөңкіп ала жөнеліпті. Ол украиналық әріптесін «сайлаусыз сайланып алған диктатор» деп атап, оны толассыз келіп ақша құйыла беруі үшін соғысты созуға құмар болып отыр деп айыптайды. (Соғыс жүріп жатқан ел қалай сайлау өткізеді, онда шаруасы жоқ, ал ақша жөніндегісі – баланы сөзі). Ақ үйдің айқайшысы бұдан әрі Зеленьскийді «елсіз қалуы мүмкін» деп қорқытады.
Дональд Трамптың сондағы жаны шығып отырғаны – соғыс басталғалы АҚШ Украинаға 350 млрд қаржы беріп қойса, күллі Еуропадан келіп түскені 150 млрд қана екен. Осыған байланысты ол әріптесін «қарапайым табысты комик» деп келемеж етіп, осы ақшаның жартысын өздері «құртып жіберді» деп артымен бал ашады. Соңынан Зеленьский бұл цифрлардың бәрі қате екенін дәлелдеп берді. Оның есебінше, осы кезге дейін Украина соғысқа 320 млрд доллар жаратқан. Оның 200-ін АҚШ пен Еуропа берсе, Украинаның өзінен 120 млрд шыққан.
Өзі нағыз комик Трамп соңында сайлау жайында айта келіп, Зеленьскийді ел халқының 4 пайызы ғана қолдайды деп айды аспаннан бір-ақ шығарады. Бұған Украина президенті бұдан бірер күн ғана бұрын таратылған болжамда өзін қолдаушылар мөлшері 57 пайыз болып тұрғанын алға тартады.
Айтатыны жоқ. Трамптың бұлайша соқтығып жатқанына Еуропа саясаткерлері қатты қайран қалуда. Қалай дегенде де, кәрі құрлық мемлекеттерінің арасын дәл осы Володимир Зеленьскийдей өзара жақындастырып берген саясаткер бұрын-соңды болған жоқ. Мұны да еуропалықтардың өздері айтып отыр.
