Аса көрнекті академик дәрігер Камал Ормантаев дүниеден озды
АЛМАТЫ. 12 ақпан. Қазақстандағы балалар хирургиясының негізін қалаушы, академик, Мемлекеттік сыйлықтың лауреаты Камал Ормантаев 88 жасында дүние салды. Бұл туралы rast.kz хабарлайды.
Қаралы хабарды әлеуметке С. Ж.Асфендияров атындағы Қазақ ұлттық медицина университетінің баспасөз қызметі жеткізді.
Қазақстан медицина саласы ауыр қайғыға ұшырады. Республика балалар хирургиясының, педиатриясының, травматологиясы мен анестезиологиясының негізін қалаушы аса көрнекті ғалым 7 жыл бойы комада жатып, өзінің ақтық сапарына аттанды.
Ол – медицина ғылымдарының докторы, профессор, ғылымға еңбегі сіңген қайраткер, ҚР Ғылым академиясының академигі, Қазақстан профилактикалық медицина академиясының академигі және вице-президенті, Қазақстан Республикасы Мемлекеттік сыйлығының лауреаты.
Камал Сәруарұлы Ормантаев 1936 жылы 11 қыркүйекте Қызылорда облысы Қармақшы ауданында туған. 1959 жылы Алматы мемлекеттік медицина институтының педиатрия факультетін бітірген. 1961 жылы кандидаттық диссертациясын қорғайды. Сол жылы осы жоғары оқу орнында балалар хирургиясы кафедрасының ассистенті болып еңбек жолын бастайды.
1971 жылы КСРО МҒА Педиатрия ғылыми-зерттеу институтында докторантура бітіріп, докторлық диссертацияны қорғайды, осыған орай оған профессор атағы беріледі.
Камал Ормантаев 1968-2012 жылдар аралығында Алматы мемлекеттік институтында балалар хирургиясы кафедрасын басқарды. Осы 43 жылдың ішінде ұлағатты ұстаздың қолынан 1500-нан астам балалар дәрігері ұшырылып, денсаулық сақшылары қатарына қосылды. Түлектердің көбі облысаралық балалар хирургиясы бойынша ұлттық орталықтардың жетекшілері, кафедра меңгерушілері болды.
Академик Камал Ормантаев жоғары білікті мамандар даярлауда хирургтардың кәсіби жағынан жан-жақты болып қалыптасуына, ғылымның дамуына және оның халықаралық деңгейге көтерілуіне үлкен көңіл бөлді.
Жоғары білікті балалар хирургінің өзі көкірек қуысы, өкпе, өңеш, құрсақ қуысы, бас сүйек пен бүйрек секілді ағзаларға 24 000-ға жуық күрделі ота жасады.
Камал Ормантаев – 320-дан аса ғылыми еңбектің, балалар хирургиясы бойынша кеңестік нұсқаулардағы 9 тараудың және 9 монографияның авторы.
Ол II дәрежелі «Достық», III дәрежелі «Барыс» және «Парасат» ордендерімен марапатталған.
Осылайша Қазақстан медицинасы мен медициналық білім беру саласына ұшан-теңіз үлес қосқан атақты академик арамыздан кетіп бара жатыр.
Біз осы қазаға байланысты марқұмның отбасына, жұбайы Роза Ормантайға, балалары мен туған-туыстарына қайғыларына ортақтасып көңіл айтамыз.
Алла алдыңыздан жарылқасын, Камал аға! Нұрыңыз пейіштің төрінде шалқысын.
* * *
Академик Камал Ормантаевтың рухына арналған қонақасы 12 ақпан күні сағат 18:00-де өтеді. Мәнзілі: Алматы қаласы, Желтоқсан көшесі, 167. Қабылдау үйі.
Қоштасу рәсімі 13 ақпан күні сағат 10:00-да болады. Мәнзілі: Алматы қаласы, Бөгенбай батыр көшесі, 151. Қазақ ұлттық медицина университетінің «Конкордия» театры.
Еске алу асы 13 ақпанда сағат 13:00-де «Ритц Палас» мейрамханасында өтеді. Мәнзілі: Алматы қаласы, Әл-Фараби даңғылы, 1.
