Нұрсұлтан Назарбаевтың банкі бір жылда 59 млрд теңге пайда тапқан
АСТАНА. 5 ақпан. Қазақстанның бұрынғы президент Нұрсұлтан Назарбаевтың бір банкі өткен 2024 жылы оны 59 млрд теңгеге байыта түсті. Бұл туралы Orda.kz ақпарына сүйенген rast.kz хабарлайды.
«Нұрсұлтан Назарбаев – енді жай ғана экс-президент емес, Ресейде табысты қаржыгер атанған адам. Оның «Азия-Тынық мұхит банкі» (АТБ) 2024 жылды 11,3 миллиард рубль таза пайдамен аяқтады. Бұл – шамамен 59 миллиард теңге», – деп жазады Orda.kz.
Ресейдің Орталық банкі жариялаған есеп-қисап бойынша, АТБ-ның негізгі табыс көзі – несие беру. 2024 жылы банктің пайыздық түсімдері 31,2 миллиард рубльге (162,8 миллиард теңге) жеткен. Жазда банк 4,8 миллиард рубль таза табыс тапқан кезде сарапшылар жыл соңына дейін 14 миллиард рубльге жуық пайда түседі деп болжаған. Бірақ нақтысы бұған сәл жетпей қалды – ол 11,3 миллиард рубльді құрады. Дегенмен, мұның өзі де аз ақша емес.
2023 жылы банк басшылығы ауысты. Қазақстандық Мұрат Жәукенов орнына тәжірибелі қаржыгер Мигель Маркарянц келді. Негізінде Жәукенов банк көрсеткіштерін көтеріп кетті, ал Маркарянц бұл жетістікті одан әрі дамытты.
Қаржылық есеп мынадай: Назарбаев 2021 жылдың соңында Ресейдің Орталық банкі аукционынан АТБ Банкін 14 миллиард рубльге сатып алған.
Содан бері банк тек пайда тауып келеді. Жылдар бойынша көрсеткіштер мынадай:
2022 жыл – 325,3 миллион рубль таза пайда
2023 жыл – 8,1 миллиард рубль
2024 жыл – 11,3 миллиард рубль
Жалпы есептегенде, үш жылдың ішінде 19,8 миллиард рубль табыс түскен. Яғни, Назарбаев банкті сатып алуға кеткен 14 миллиардты қайтарып қана қоймай, 5,8 миллиард рубль таза пайда тауып отыр. Бұл – 30 миллиард теңге деген сөз.
Қазіргі таңда АТБ Банкі жыл сайын кемінде 10 миллиард рубль табыс әкелетін жүйелі бизнеске айналған.
