Қазақстан жалақы жөнінен Ресей, Беларусь, Өзбекстан елдерінен алда тұр
АСТАНА. 19 қыркүйек. Қазақстан қызметкерлеріне төленетін айлығының орташа мөлшері бойынша Ресей, Беларусь, Әзербайжан, Өзбекстан мемлекеттерінен озық келеді. Бұл туралы ranking.kz ақпарына сілтеме жасаған rast.kz хабарлайды.
Аталмыш көрсеткіш кенересінде ТМД елдері арасында Армения мен Молдова ғана Қазақстаннан бұрын тұрса, Ресей, Беларусь, Әзербайжан, Өзбекстан және Украина* дәулеттері артта келеді. (*Бұл жерде Украинаны статусы жағынан қазір ТМД елдеріне жатқызуға да болмайтынын да айта кетуіміз керек).
Numbeo-ның мәліметіне сәйкес, 2024 жылғы 16 қыркүйектегі ахуал бойынша, Қазақстан әлемнің 96 елі ішінде 67-орында келеді. Қазір елдегі орташа айлық жалақы 582,4 АҚШ долларын (279 313 тн) құрайды.
Ал әлемдегі ең жоғары жалақы Швейцарияда тіркелген: мұндағы айлық жалақы 7,2 мың АҚШ долларына тең. Егер доллардың теңгеге қатысты бағамы бүгінгі күні 479,59 екенін ескерсек, бұл айлықтың 3 453 048 теңге болып шығатынын білер едік. Рейтингтің екінші сатысына Люксембург пен АҚШ орналасқан. Бұлардың біріншісінде жалақы 5,8 мың (2 781 622 тн) болса, екіншісінде 4,5 мың (2 158 155 тн) болып көрсетілген.
Сонымен бірге, жоғарыдағы 96 мемлекеттің тізіміне кіргендер арасында ең төменгі жалақы мөлшерлері Куба (37,6 доллар = 18 032 тн), Мысыр (146,5 доллар = 70 259 тн) және Пәкстан (180.9 доллар = 86 757 тн) дәулеттеріне тиесілі екенін айта кетейік.
Сол сияқты жоғарыда атап өтілген, ТМД елдеріндегі жоғары жалақыға ие Арменияда ол 608,1 доллар (291 638 тн) болса, Молдовада 599,5 доллардан (287 514 тн) қайырылады.
Әлемнің ірі қалалары арасындағы тізімде Алматының орташа жалақысы 678, 5 АҚШ долларын (325 401 тн) құраса, Астана 584,5 доллармен (280 320 тн) одан қалып келеді. Бұлардың біріншісіне тізімде 238-орын, ал екіншісіне 335-орын берілген.
Осы есепте Алматы ТМД елдеріне қалалары ішінде 3-орынға табан тірейді. Айлық жалақы жөнінен біздің оңтүстік астана тек Мәскеу (1,3 мың доллар = 623 467 тн) мен Санкт-Петербургке (854,55 доллар = 409 809 тн) ғана есе жібереді.
Ал ең төменгі жалақы мөлшерлері ТМД елдері арасында Бішкекте (352,6 доллар = 169 103 тн), Харьковте (358, 5 доллар = 171 933 тн) және Одессада (395, 5 доллар = 189 677 тн) тіркелген.
Қазақстанда ең жоғары айлық жалақы Атырау облысына тиесілі: ол – 594,4 мың теңге. Екінші орында Маңғыстау облысы (579, 8 мың теңге) тұрса, үштікті Ұлытау облысы (523,0 мың теңге) тиянақтайды. Сол сияқты ең аз жалақыны 297,3 мың теңге көрсеткішімен Солтүстік Қазақстан облысының тұрғындары алады.
