Қазақ бапкері Есбол Сұлтанов Туниске Олимпиада «алтынын» алып берді
ПАРИЖ. 10 тамыз. Қазақ бапкері Есбол Сұлтанов Тунис елінің қоржынына таэквондодан Олимпиялық ойындардың алтын медалін түсірді. Бұл туралы Kazpravda.kz ақпарына сүйенген rast.kz хабарлайды.
«Таэквондодан Тунис құрамасының бас жаттықтырушысы, қазақстандық Есбол Сұлтанов пен оның командасы «алтын» және «күміс» жеңіп алды», – деп жазды Kazpravda.kz өз кезегінде «Спорт Шредингера» сайтына сілтеме жасай отырып.
Турнирде 80 келіге дейінгі салмақтағы Фирас Катуси финалда парсы Мехран Бархордариді 2:0 етіп ұтып, алтын медальге қол жеткізсе, 58 келіге дейінгі салмақтағы Мохамед Халил Жендуби қола жүлдегер атанды.
Катусидің «алтыны» – Тунистің таэквондодан тарихта бірінші рет жеңіп алып отырған ең жоғары марапаты. Жалпы, бұл турнирде тунистіктер 1 алтын, 1 күміс және 2 қола медальды еншілеп отыр.
Ал қазақ Есбол Сұлтановтың өзі спортшы ретінде 2006 жылы Азия ойындарына және 2007 жылы әлем чемпионатына қатысқан. Өткен 2023 жылдың қыркүйегінде Сұлтанов инстаграмда екі шәкіртінің кадеттер арасындағы әлем чемпионатында жеңіске жеткендерін жазды. Өзі артынша Туниске сол елдің құрама командасының тізгінін ұстау үшін кетіп қалды.
37 жастағы Сұлтанов өзінің жаңа командасындағы жұмысын Африка чемпионатында шәкірттеріне 8 алтын медаль алдырумен және Париж Олимпиадасына 4 лицензия жеңгізумен бастады. Оны тағайындағанға дейін Тунис құрамасы әлем чемпионатынан бірде-бір медаль ала алмай, құрқол қайтқан екен.
Айта кетейік, Париж Олимпиадасына Қазақстаннан екі таэквондошы қатысқан еді. Олардың бірі – 20 жасар Самирхан Абабакиров 58 келіге дейінгі салмақта сынға түсіп, 1/8 финалда жарыс жолынан шығып қалса, 18 жасар Батырхан Төлеуғали 80 келіге дейінгі салмақта әлем чемпионатының 2011 және 2015 жылдарғы қола жүлдегері, малилік Исмаэл Кулибаланы ұтып, итальян Симоне Алесссиоға есе беріп алды.
Суретте: Есбол Сұлтанов сол жақта бірінші
