USD
АСТАНА. 27 шілде. Олимпиада ойындарына қатысудан бас тартқан қазақстандық теннисші Елена Рыбакинаның жақында Канадада өтетін коммерциялық турнирге барғалы тұрғаны белгілі болды. Бұл туралы tennis.com ақпарына сүйенген rast.kz хабарлайды.
Аталмыш халықаралық турнир Үйеңкі жапырағы елінің Торонто қаласында 6 тамызда жалау көтереді.
Спортшының өзінің айтуынша, Уимблдон турнирінен кейін ол өткір бронхитпен ауырып қалыпты, соған байланысты дәрігерлер Парижге баруға тыйым салыпты-мыс. Дегенмен, Рыбакина бұл уақытта Түркияның Бодрум қаласында демалып, балмұздақ жеп жүргені оның Instagram әлеуметтік желісіне салған суреттері арқылы белгілі болған еді.
«Рыбакина бірнеше жарысты соңына дейін жеткізбей, орта жолдан тастады, барлығында да денсаулығы сыр берген. Олимпиаданы айтпағанда, ол Индия-Уэллс, Рүм, Истборн турнирлерінде ауырып, кортқа шыға алмады. 25 жастағы теннисші соңғы рет Уимблдон турниріне қатысып, жартылай финалда Барбара Крейчиковадан жеңілді. Енді ол Солтүстік Америкадағы хард турнирлеріне қатысады. Ең алдымен Торонтода өтетін National Bank Open турнирінде бағын сынап көреді. Аталған турнир 6 тамызда басталады», – деп жазылған tennis.com ресурсының мақаласында.
«Жалдамалы әскер жанын салып соғыспайды. Рыбакина туралы ақпаратты естіп, шок болып отырмыз. Ауырып қалыпты деген себеп айтылды. Оның өзін ватсаптағы аудио жазба арқылы алдық. Осы жағдайға тікелей жауапты Ұлттық олимпиялық комитет пен Қазақстан теннис федерациясы неге толыққанды мәлімет бермейді», – деп жазды спорт журналисі Аслан Каженов.
