Теннисші Рыбакина Олимпиадаға Қазақстан атынан қатысудан бас тартты
![](https://rast.kz/wp-content/uploads/elena-rybakina1.jpg)
АСТАНА. 25 шілде. Қазақстанның ең үздік теннисшісі Елена Рыбакина Париж Олимпиялық ойындарына қатыспайтын болды. Бұл туралы Sport Arena ақпарына сүйенген rast.kz хабарлайды.
«Қазақстанның үздік теннисшісі Олимпиадаға қатыспайды. Бұған таң қалуға болмайды. Елена Рыбакина бір жылдан астам уақыттан бері біздің еліміздің атынан ресми жарыстарға қатысқан жоқ», – делінген таблоид хабарламасында.
Олимпиаданың ресми сайты Рыбакинаны жалғыз разрядты және микст торларынан шығарып тастады. Жеке разрядта Қазақстанның үздік теннисшісін (4-орын) аустралиялық Дарья Сэвилл (77-орын) алмастырады. Ал микстке келсек, онда Рыбакина біздің Александр Бубликпен жұптасып өнер көрсетуі керек еді.
Осыған орай Sport Arena Ресейден бізге натурализациялану жолымен келген Рыбакинаның Қазақстан атынан жарыстарға қатысудан тайқып кете берушілігі бүгін бастала салмағанына, оның берік үрдіске айналғанына ерекше назар аударады. Портал оған айғақ ретінде мынадай нақты деректерді алға тартады:
– Елена өткен, 2023 жылдың басты жарысы – Қытайдың Ханчжоу қаласында өткен Азия ойындарында құрама сапынан табылған жоқ. Сәл кейінірек ол Азиядада жеңімпаз атанған спортшыны басқа сайыста екі сетте «тас-талқан» етеді;
– Өткен күзде жарақат алдым деген сылтаумен құрама сапында Билли Джин Кинг Кубогы үшін жарысқа қатысудан бас тартты;
– 2024 жылы Жапонияда өткен Федерация кубогы үшін маңызды матчқа бармай қалды. Сылтауы – Олимпиадаға дайындық жасау.
Елена енді сол Олимпиялық ойындарға да қатыспайтын болып отыр. Ол мұның алдында Лондонда өткен «Уимбилдон» халықаралық турнирінде өнер көрсетіп, жартылай финалға дейін барған еді.
Сонда ол үшін шынымен Олимпиададан гөрі коммерциялық жарыстар маңыздырақ па?
P.S. Қазақстан Теннис федерациясындағылар спортшының Ойындар-2024-ке қатыспау жөнінде шешім қабылдауына кенеттен сырқаттанып қалуы себепкерлік еткенін айтады. Бірақ мұның өзі түбі ресейлік Елена Рыбакинаның соңғы жылдары табанды түрде Қазақстан құрамасы сапында өнер көрсетуден шет қалып келе жатқанын жоққа да шығара алмайды, неге бұлай болып жүргенін ақтап та ала алмайды. Сонда оған Қазақстанның ақшасы тектен-текке беріліп жүрген болды ма, Болат Өтемұратов мырза?!