USD
ПАРИЖ. 25 шілде. Бокстан Қазақстан құрамасы Париж Олимпиялық ойындары басталар алдындағы пысықтау жаттығуын бастап кетті. Бұл туралы Ulyssport.kz ақпарына сүйенген rast.kz хабарлайды.
Францияға жеткен боксшыларымыз бас жаттықтырушы Мырзағали Айтжановтың басшылығымен жергілікті климатқа бейімделу жаттығуларына кірісті.
Боксшыларымыздың Париж рингінде өткізетін жекпе-жектерінің кестесі белгілі болды. Ал бүгін, 25 шілде күні олардың қарсыластарының аты-жөндері анықталады.
Олимпиада төрінде Қазақстанның ерлер құрамасы толық құрамда, яғни 7 салмақ бойынша өнер көрсетеді. Еліміздің намысын бұл сынақта Сәкен Бибосынов (51 келі), Махмұд Сабырхан (57 келі), Мұхамедсабыр Базарбайұлы (63,5 келі), Асланбек Шымбергенов (71 келі), Нұрбек Оралбай (80 келі), Айбек Оралбай (92 келі) және Қамшыбек Қоңқабаев (+92 келі) қорғайды.
Әйелдер арасындағы турнирде бірінші рет 3 бірдей спортшымыз Олимпиадада күш сынасқалы отыр. Олардың тобын Назым Қызайбай (50 келі), Карина Ибрагимова (57 келі) және Валентина Хальзова (75 келі) құрайды.
Былғары қолғап шеберлері өз жекпе-жектерін 27 шілде, сенбі күні бастайды. Бұл күні бізден 63,5 келіге дейінгі салмақтағы Мұхаммедсабыр Базарбайұлы Астана уақытымен сағат 15:30-да басталатын күндізгі сессияда рингке шықса, 80 келіге дейінгі салмақтағы Нұрбек Оралбай сағат 20:00-де басталатын кешкі сессияда күш сынасады. Екеуі де 1/16 финалдық іріктеу сайыстарын өткізеді.
