USD
ЛАС-ВЕГАС. 12 шілде. Қазақ кәсіпқой боксшысы Жәнібек Әлімханұлы ауруханаға түсіп қалуына байланысты оның жекпе-жегі кейінге қалдырылды. Бұл туралы Nur.kz ақпарына сүйенген rast.kz хабарлайды.
«Жәнібектің 14 шілдеге жоспарланған жекпе-жегі өтпейтін болды», – делінген Top Rank промоутерлік компаниясының хабарламасында.
Қазақ боксшысының менеджері Эгис Климастың айтуынша, Жәнібек cалмақ қуу кезінде есінен танып құлаған. Кейін ол дереу медициналық орталыққа жеткізілген.
«Жәнібек Әлімханұлы бейсенбіде кешке ағзаға су жетіспеуіне байланысты ауруханаға түсіп қалғаннан кейін сенбіде Лас-Вегастағы Palms Casino Resort аренасында Андрей Михайловичке қарсы өтуі керек болған жекпе-жектен бас тартуға мәжбүр болды», – деп атап көрсетілген хабарламада.
Айта кетейік, Жәнібек Әлімханұлы Астана уақытымен 14 шілде күні таңертең АҚШ-тың Лас-Вегас қаласында Жаңа Зеландияның тегі ресейлік боксшысы Андрей Михайловичпен жұдырықтасып, IBF және WBO чемпиондық белбеулерін қорғауы керек еді. Алайда күтпеген жерден оның сырқаттанып қалғаны бұл жоспарды бұзып жіберді.
Қазақ боксшысы соңғы рет 2023 жылы қазанда шаршы алаңға шыққан. Ол Германия өкілі Винченцо Гуальтиериді 6-раундта нокаутпен жеңген-ді.
Түнде сонымен бірге Жәнібектің ауруханадан шыққаны да белгілі болды.
Бұған дейін қазақ боксшысының командасы Instagram желісіне Жәнібектің ауруханада жатқан суретін жариялап, оның қазіргі жағдайы туралы жазған болатын.
«Құрметті ағайындар! «Жекпе-жек болмайды» деген хабарды оқып, сіздердің де көңіл күйлеріңіз түскенін білеміз. Себебі, жанашыр, тілеулес екендеріңізді білеміз! Әлемнің түкпір-түкпірінен қаншама жанкүйер өнерімізді көрсек деп асыға күтті. Біз де рингте Qazaq style-ді көрсету үшін барымызды салып дайындалдық. Дегенмен көп спортшылар сияқты біз де салмақ жасау барысында қиындыққа тап болдық. Бірінші рет осындай жағдайды бастан өткердік. Оңай емес екен! Түнімен ауруханада болдық! Мұны да көру керек болған шығар! Қазір Жәнібектің жағдайы бірқалыпты! Денсаулық бірінші орында! Бұйыртса 2-3 ай қалыпқа келіп, рингке қайта ораламыз! Тілеулес жандардың бәріне мың алғыс! Ауырмаңыздар!», – делінген мәлімдемеде.
Соңынан ауруханадан шыққан Жәнібектің өзі де мәлімдеме жасап, жұрттың өзін қиын шақта қолдауына алғыс сезімін білдірді.
«Әр қиындық артында жеңілдік бар! Салмақ қуу барысындағы сынақты да бастан өткізіп жатырмыз, ағайын! Уайымдап жатқан жанашыр жанның бәріне көп рақмет! Аллаға шүкір, ауруханадан шықтық. Денсаулық бірінші орында! Ауырмаңыздар, жақындарыңыз ауырмасын. Біз жауынгерміз ғой, мұндай сынақтар бізді сындырмайды, шыңдайды! Бұйыртса, әлі талай әлемге қазақ стилін көрсетеміз! Қолдауларыңызға рақмет!», – деп жазды Жәнібек Әлімханұлы Instagram желісіндегі парақшасына.
