USD
МӘСКЕУ. 4 шілде. Рязаньда Украинаның Буча қаласын басып алып, бір ай бойы айуандық әрекет жасаған бригаданың командирі Артём Городилов қамауға алынды. Бұл туралы The «Коммерсантъ» ақпарына сүйенген rast.kz хабарлайды.
Ресей мәтбұғатының мәліметінше, федералды қауіпсіздік қызметінің әскери қарсы барлаушылары 83-ші жеке гвардиялық десант-шабуыл бригадасының командирі, полковник Артём Городиловті ұстаған. Оған алаяқтық жасады деген айып тағылып отыр. Ал Ресейден тыс жерлерде Городилов украинның Буча қаласында бейбіт тұрғындарды жаппай қырып салуға қатысы бар деп есептеледі.
Алайда мына қылмыстық істің бүге-шігесі толық айтылмайды. Басылымның ақпарынша, полковник аса ірі көлемде алаяқтық жасады деген айыпқа бұйырылған. Ал РФ заңына сәйкес, 1 млн рубль көлеміндегі ұрлық «аса ірі көлемдіге» жатады.
Бүгін, 4 шілде күні тергеушілер Мәскеудегі 235-ші гарнизонның әскери сотынан оны қамауға алу шарасына пәрмен беруді сұрады.
Городилов 2019 жылдан бері 234-ші гвардиялық десант-шабуыл полкын басқарды. Бұдан бұрын The New York Times анықтағандай, тап осы әскери басшының қарауындағы сарбаздар Буча мен Ирпеньдегі бейбіт тұрғындарды жаппай қырғынға ұшыратуға қатысқан. Басылымның атап көрсеткеніндей, полк басшылығы басқыншылықтың алғашқы апталарында Бучада болған, сондықтан қалада сол уақыттары нендей қылмыстар жасалғанын олардың білмеулері мүмкін емес.
Ресейдің Украинаға басып кіріп, соғыс ашуына бір жыл толуына орай АҚШ жариялаған санкциялық тізімде аталмыш полковниктің болуы да тектен тек болмаса керек.
РФ басқыншы армиясы Бучаға 2022 жылғы 25 ақпанда, яғни соғыс басталған күннің ертеңіне басып кірді. Журналистердің зерттеулері деректері бойынша, украин қалаларының бейбіт тұрғындарын қыру зобалаңы тап осында басталған. 3 наурызда Украина Қарулы күштері Бучаны толық жау қолына тастап шықты. Қала 28 күн бойы Ресей әскерилерінің басқыншылығында болды. Оны украин қорғаушылары азат еткеннен кейін бүкіл әлем РФ армиясының бұл қалада жасаған барша айуандық әрекеттерінен хабардар болды. Олардың қатарында бейбіт тұрғындарды ермекке атып өлтіру, ұрып-соғу, зорлау, тонау әрекеттерінің әлденеше ондаған фактілері анықталып тіркелді. Сол күндері Бучада 400-ден астам тұрғын оққа ұшты.
