Дания Путиннің «көлеңкелі флотын» бұғаздан өткізбеуге бекініп отыр
![](https://rast.kz/wp-content/uploads/daniia-tenevoi1.jpg)
КОПЕНГАГЕН. 18 маусым. Дания билігі Кремльдің Батыс санкцияларын айналып өту мақсатында мұнай тасымалдау үшін жинап алған жүздеген танкерлерден құралған «көлеңкелі флотына» қарсы шаралар дайындауға кірісті. Бұл туралы The Moscow News ақпарына сүйенген rast.kz хабарлайды.
«Ресей мұнайы экспортының әлем нарығына түсетін әрбір үшінші баррелі өтетін түйінді бұғаздарды бақылауында ұстап отырған ел оның Балтық теңізіндегі «көлеңкелі» танкерлері қозғалысын шектеу мүмкіндігін қарастыру үстінде», – деп мәлімдеді дүйсенбіде Дания СІМ басшысы Ларс Локке Расмуссен.
Дания билігінің пікірінше, Ресей баррельдерін тасымалдайтын танкерлер қоршаған ортаға зор экологиялық қауіп төндіріп отыр. Себебі, әдетте бұлардың бәрі кемінде бұдан 20 жыл бұрын жасалған, барынша ескі, металл сынықтары ретінде есептен шығарылған кемелер болып келеді. Сонымен қатар халықаралық сақтандырудан ада. Ескі танкерлер теңізде мұнайдың төгілмеуіне кепілдік бере алмайды.
Дания қазір Балтық теңізі өңіріндегі басқа елдермен, сондай-ақ ЕО-ға мүше мемлекеттермен осы мәселе бойынша жан-жақты келісссөз жүргізіп жатыр.