USD
БАНГКОК. 2 маусым. Бүгін Бангкокта өтіп жатқан іріктеу турнирінің ширек финалында Валентина Хальзова мен Назым Қызайбай жеңіске жетіп, Олимпиадаға жолдама алды. Бұл туралы Olympic.kz ақпарына сүйенген rast.kz хабарлайды.
Турнирге Африкадан – 25, Америкадан – 27, Азиядан – 31, Еуропадан – 39, Океания аймағынан – 9 мемлекеттің, барлығы 131 елдің 578 боксшысы қатысты.
Мұнда ерлер 57, 80 келіге дейінгі салмақтарда – 3, ал 51, 92, +92 келіге дейінгі салмақтарда – 4, сондай-ақ 63,5 және 71 келіге дейінгі салмақтарда 5 квота, әйелдер 60 келіге дейінгі салмақтарда – 3, сондай-ақ 50, 54, 57, 66, 75 келіге дейінгі салмақтарда 4 квота алады.
Бүгін күндізгі сессияда 75 келіге дейінгі салмақтағы Валентина Хальзова колумбиялық Ширлейдис Ороскомен шайқасты. Үш раунд бойы жекпе-жек тізгінін өз қолына алған жерлесіміз бәсекелесіне ешқандай мүмкіндік берген жоқ. Есеп – 5:0 (5:0, 5:0, 5:0).
Валентина бұған дейін украин Каролина Махно мен моңғол Ерденетуя Енкхбаатарды тізе бүктірген.
Осылайша Хальзова еліміздің әйелдер құрамасына екінші олимпиялық лицензияны алып берді. Оның біріншісін өткен жылы Ташкентте өткен әлем чемпионатының қорытындысы бойынша 57 келіге дейінгі салмақтағы Карина Ибрагимова жеңіп алған болатын.
Кешкі сессияда 50 келіге дейінгі салмақтағы Назым Қызайбай КХДР атлеті Канг Су Хуангпен қолғап түйістірді. Жекпе-жектің бірінші раундында корей боксшысы 5:0 есебімен алға шықты. Алайда келесі бөлікте қарқынды арттырған біздің қыз есепті теңестіре білді. Ал соңғы кезеңде Назым қарсыласын бір рет нокдаунға жіберді. Нәтижесінде ол 5:0 (0:5, 5:0, 5:0) есебімен жеңіс тұғырына көтерілді. Сөйтіп, Қазақстан әйелдер құрамасында Олимпиада квотасына қол жеткізген үшінші боксшы болды.
Назым бұған дейін словак Николь Дурикованы, кореялық Жух Юнг Жунгті және британиялық Саванна Стаблиді жеңген еді. Мұның барлығында ол 5:0 есебімен басымдық көрсетті.
Бұған дейін 2014, 2016 жылдары әлем чемпионы атанған Назым Қызайбай осы кезге дейін Олимпиадаға қатысып көрмеген еді.
Бұлардан басқа үш боксшымыз – Ұлжан Сәрсенбек (54 кг), Римма Волосенко (60 кг), Наталья Богданова (66 кг) турнирден құрқол қайтты.
Суреттерде: Валентина Хальзова мен Назым Қызайбай Олимпиялық ойындардың лицензиясын қолдарына ұстап тұр
