USD
БАНГКОК. 28 мамыр.Таиланд байтағы – Бангкок қаласында өтіп өтіп жатқан бокстан лицензиялық турнирде Мұхаммедсабыр Базарбайұлы екінші кездесуінде жеңіске жетті. Бұл туралы 1bol.kz ақпарына сүйенген rast.kz хабарлайды.
Бүгін күндізгі сессияда 63,5 келіге дейінгі салмақта Түркия боксшысы Мизан Айкөлмен 1/8 іріктеу финалында шайқасқан жерлесіміз бәсекелесін қиналмай ұтты. Ол төрешілердің бір ауызды шешімімен жеңіске жетті.
Бұған дейін 1/16 іріктеу финалында шаршы алаңға шыққан Мұхаммедсабыр филиппиндік Кристиан Питт Лауреттені тізе бүктірген еді.
Енді кешкі сессияда Қазақстанның әйелдер құрамасынан 54 келіге дейінгі салмақтағы Ұлжан Сәрсенбек шаршы алаңға шығады. Ол 1/8 финалда АҚШ атлеті Шэр Мэй Патрисиомен жұдырықтасады.
Турнир 2 маусым күні өзінің мәресіне жетеді. Іріктеу шайқастары 30 мамырда аяқталады. 31 мамырда – ширек финалдық, 1 шілдеде – жартылай финалдық, ал 2 маусымда финалдық жекпе-жектер ойналады.
Бангкоктағы екінші олимпиялық квалификациялық турнирге Қазақстанның ерлер құрамасынан – 1, әйелдер терме жамағатынан 5 былғары қолғап шебері барды.
Еске сала кетейік, бұған дейін бокстан Олимпиада жолдамалары Қытайдың Ханчжоу қаласында өткен Азия ойындары мен Италияның Бусто-Арсицио қаласында өткен іріктеу турнирі қорытындысы бойынша таратылған болатын. Осы сайыстарда біздің ерлер жеті лицензияның алтауын, ал әйелдер алтаудың біреуін жеңіп алды.
Атап айтқанда, қазір біздің атлеттерден Сәкен Бибосынов (51 кг), Махмуд Сабырхан (57 кг), Асланбек Шымбергенов (71 кг), Нұрбек Оралбай (80 кг), Айбек Оралбай (92 кг), Қамшыбек Қоңқабаев (+92 кг), әйелдерден Карина Ибрагимова (57 кг) Олимпиялық ойындарға қатысу мәселесін шешіп қойды.
Тағы да еске сала кетейік, бұған дейін Мұхаммедсабыр Базарбайұлынан бөлек, Назым Қызайбай (50 кг), Римма Волосенко (60 кг) және Валентина Хальзова (75 кг) рингке көтеріліп, қарсыластарын ұтқан болатын.
