Өзбекстан президенті Шавкат Мирзиёев те Жеңіс парадына қатысатын болды
МӘСКЕУ. 7 мамыр. Кеше Өзбекстан президенті Шавкат Мирзиёевтің де Мәскеуде 9 мамыр күні өтетін Жеңіс парадына баратыны белгілі болды. Бұл туралы kun.uz ақпарына сүйенген rast.kz хабарлайды.
Бұған дейінгі хабарламада айтылған Орталық Азия мемлекеттері басшылары арасында өзбек лидерінің аты аталмаған еді. Оған сол сияқты Әзербайжан президенті Ильхам Әлиевтің де бармайтыны баяндалған. Ал кейінірек жарияланған хабарламада Шавкат Мирзиёевтің тізімде бар екені айтылды.
«Өзбекстан президенті Шавкат Мирзиёев Мәскеуде Жеңістің 79 жылдығы құрметіне арналған парад қонақтары арасында болады», – делінген хабарламада. Онда аталмыш шараға сондай-ақ Беларусь, Қазақстан, Қырғызстан, Тәжікстан, Түрікменстан, Куба, Лаос және Гвинея-Бисау басшылары қатысатыны айтылған.
«Өзбекстан президенті Шавкат Мирзиёев Мәскеуде 9 мамырда өтетін 1941-1945 жылдарғы соғыстағы Жеңістің 79 жылдығына арналған әскери парадтың құрметті қонағы болады», – делінген Кремль баспасөз қызметінің осыған орай жариялаған мәлімдемесінде.
Сөйтіп, Ресей президенті Владимир Путиннің шақыруы бойынша парадқа келетіндер арасында Беларусь президенті Беларуси Аляксандр Лукашенка, Қазақстан президенті Қасым-Жомарт Тоқаев, Қырғызстан президенті Садыр Жапаров, Өзбекстан президенті Шавкат Мирзиёев, Тәжікстан президенті Эмомали Рахмон, Түрікменстан президенті Сердар Бердымухамедов, Куба президенті Мигель Диас-Канель Бермудес, Лаос президенті Тхонглун Сисулит және Гвинея-Бисау президенті Умару Сиссоку Эмбало бар екендері белгілі болып отыр.
Ресей билігі Жеңіс күнін соңғы кездері өзінің саяси мақсаттарына, соның ішінде Украинадағы басқыншылық соғысын ақтауға пайдаланып жүр. 2022 жылы Ресей Украинаға басып кірген соң Мәскеудегі парадқа баратын әлем лидерлерінің қатары азайды.
Былтыр Мәскеудегі парадқа Орталық Азия елдерінің басшылары, Аляксандр Лукашенка және Армения премьері Никол Пашинян барған. Биыл Пашинянның Мәскеудегі шараға келмейтіні әу басьан белгілі болған.
Былтырғы парадта Путин Батыс елдерін «русофобияны күшейтті», «отбасы құндылығын бұзды» деп айыптаған. Мұндай сөзді ол Украинада соғыс басталғалы жиі айтып жүр.
«Азаттық радиосының» хабарлауынша, әлем саяси сарапшылары Орталық Азия лидерлерінің Мәскеудегі 9 мамыр парадына баруы олардың сыртқы саясатты өз бетінше шешім қабылдамай алмайтындарын, Ресейге әлі де экономикалық тұрғыда тәуелді екендерін көрсетеді деген тұжырым жасап отыр.
