USD
КИЕВ. 28 шілде. Украина Қарулы күштері күзге қарай Мәскеуді өздерінде шығарылған баллистикалық зымырандармен соққылауды қолға алатын түрі бар. Бұл туралы The Moscow Times ақпарына сілтеме жасаған rast.kz хабарлайды.
Мұның ұшқышсыз ұшақтармен шабуылдағаннан гөрі әлдеқайда қуатты да зарарлы болатыны айдан анық.
«Украина Қарулы күштері алдағы күзде Мәскеуге алғашқы баллистикалық зымырандар соққыларын бере бастауы мүмкін», – деп мәлімдеді Fire Point компаниясының егесі және бас дизайнері Денис Штилерман (суретте).
Ол украиналық белгілі журналист Дмитрий Гордонның телестудиясында берген сұхбатында қазіргі уақытта жаңа зымыранды сынаудың соңғы кезеңі жүріп жатқанын баяндады. Айтуына қарағанда, тесттік рейстерден кейін «Ресей аумағына рейдтер жасау басталады».
«Әскерилер соққылардың нақтылы қайда берілетінін анықтайтын болады, бірақ мен бұлар нақты бір маңызды нысаналар болады деп ойлаймын», – деді Штилерман.
Ол бұған қоса, баллистикалық зымырандардың украин армиясы қарауына келіп түсетін нақты уақыты олардың қозғалтқыштарының сынақта алған бағасына байланысты болатынын атап өтті.
Fire Point Украина армиясының ең ірі мердігерлерінің бірі болып табылады. Соның ішінде ол алыс қашықтықтарға соққы беретін FP-1 ұшқышсыз ұшақтары мен FP-5 «Фламинго» қанатты зымырандарын шығарады.
Маусым айының басында Украина президенті Володимир Зеленський Киев өзінің баллистикалық зымыранын жасап бітуге жақындағанын, оны Ресей аумағындағы нысандарға соққы беру үшін қолдануға болатынын айтқан еді.
