Украина Қарулы күштері Қырымға ATACMS зымырандарымен соққы берді
МӘСКЕУ. 4 мамыр. Украина Қарулы Күштері 4 мамырға қараған түні Қырымға ATACMS зымырандарымен жойқын шабуыл жасады. Бұл туралы The Moscow News ақпарына сүйенген rast.kz хабарлайды.
Ресей Федерациясы қорғаныс министрлігінің хабарламасында Украина Қарулы күштерінің өткен түнде Қырымды АҚШ-тан жақында жеткізілген ATACMS ракеталарымен атқылағандары баяндалады. Ведомствоның мәліметінше, РФ әуе қорғанысы күштері түбектің аумағынан осы типтегі 4 зымыранды атып түсірген. Бірақ олардың дәл қай жерде атып түсірілгені айтылмайды. Шабуылдан зардап шеккендер хақында да бір ауыз сөз жоқ. Соған қарағанда, бұлар тағы да жауырды жаба тоқып отырған сияқты. Ал Украина тарапы әзірге бұл жөнінде мәлімдеме жасамады.
24 сәуірде Америка Құрама Штаттары Украинаға ұзақ қашықтықтағы ATACMS зымырандарын жасырын жеткізгені белгілі болды. Bloomberg Ақ үйдегі дереккөзге сілтеме жасай отырып жазғандай, ракеталар АҚШ президенті Джо Байден 12 наурызда мақұлдап, қол қойған Украинаға 300 миллион доллар көлеміндегі әскери көмек пакетіне енгізілген. Алайда Киевке берілген ATACMS зымырандарының нақты саны айтылмады.
The New York Times газеті бірнеше күннен кейін Пентагонның жоғары лауазымды өкілдеріне сілтеме жасай отырып, АҚШ-тың Украинаға Қырымдағы әскери нысандарды ATACMS зымырандарымен атқылауға рұқсат бергенін жазды. Сондай-ақ, бұл ракеталарды Украинаның оккупацияланған аймақтарындағы Ресей армиясына соққы беру үшін пайдалануына рұқсат етілді.
