USD
АТЫРАУ. 7 сәуір. Атырау облысында да су тасқынының қауіпті қарқын алуына орай табиғи сипаттағы төтенше жағдай жарияланды. Бұл туралы «Ақ Жайық» ақпарына сүйенген rast.kz хабарлайды.
Аймақта төтенше жағдай жариялау жөніндегі шешімге облыс әкімі Серік Шәпкенов қол қойды.
«Қазіргі уақытта Жем өзені елді мекенге қауіп төндірмес үшін, қарғын судың деңгейін түсіру өте өзекті мәселе болып отыр. Осы ретте Жемнің бойында орналасқан жасанды бөгеттерді жару арқылы судың арнасын бұру жұмыстары басталды», – делінген хабарламада.
7 сәуірде Атырау уәлаятын аумағына Премьер-Министр Олжас Бектенов келді. Ол жартылай су басқан Құлсары қаласын аралап көрді.
Әкімдіктің хабарлауынша, Бектенов аймақты әуеден бақылап, Жем мен Жайық өзендерінің жағдайына қаныққан. Соңғы ресми мәлімет бойынша, өзен маңындағы аудандардан 28,5 мыңнан астам адам эвакуацияланған.
«Құтқарушылар тұрғындар мен олардың үй жануарларын эвакуациялауға көмектесіп жатыр. Осы уақытқа дейін Жылыой ауданында 28 501 тұрғын, оның ішінде 6 781 бала эвакуацияланды», – делінген хабарламада.
Жексенбі күні төтенше жағдайлар бригадасы Жем өзені маңындағы жасанды бөгеттерді жарды. Ол бөгеттерді бұрын шаруа қожалықтары су жинау үшін салған.
Ақпаратқа қарағанда, су бөгетін жару өзен арнасын Каспий жаққа бұруға мүмкіндік береді.
Қазір облыстың үш ауданында жағдай күрделі деп айтылады, екі елді мекенге қатынау мүмкін емес.
5 сәуірден бері Жылыой ауданының орталығы – Құлсары қаласынан 15 мыңнан астам адам қауіпсіз жерге көшірілген. Қалада жалпы 66 мың адам тұрады. 2600 жеке үй мен әкімшілік ғимарат су астында қалған.
Билік Миялы, Ақкөре, Жангелдин, Жасқайрат және Көздіқара елді мекендерін су басу қаупі сейілгенін айтты.
7 сәуірде күндіз Төтенше жағдай министрлігі Құлсары қаласында екі ер адамның денесін тапқанын хабарлаған. Олар су басқан үйлерін трактормен барып көрмек болып, жолшыбай аударылған.
