Қызылорда облысында егіз сәбиін жарты миллионға сатқан әйел сотталды
![](https://rast.kz/wp-content/uploads/femida2-1-777x440.jpg)
ҚЫЗЫЛОРДА. 30 наурыз. Қызылорда облысында тұратын әйел жаңа туған егіз нәрестесін жарты миллион теңгеге сатып жібергені үшін сот арқылы жаза алды. Бұл туралы Nur.kz ақпарына сүйенген rast.kz хабарлайды.
Сәбилерін сатқан әйел 8 жылға сотталса, балаларды сатып алған ерлі-зайыптылар 2 жылға бас бостандығынан айырылды.
Іс материалдары бойынша, Арал ауданының тұрғыны жүкті болып, егіз сәби күткен. Бірақ пайда табу үшін ішіндегі сәбилерді сатуға бел байлаған.
Әйел өзі білетін ерлі-зайыптыларға егіздер сатып алуды ұсынып, тараптар өзара келіскен. 2023 жылдың қаңтар-сәуір айлары аралығында айыпталушы сотында отырған ерлі-зайыптылар мобильді аударымдар арқылы Арал ауданының жүкті тұрғынына 60 мың теңге аударған.
21 сәуірде әйел егіз баланы дүниеге әкеліп, кейін ерлі-зайыптыларға беріп, олардан тағы 200 мың теңге алған.
«Әрі қарай келісілген қаражатты бөліп төлеуге келісіп, ерлі-зайыптылар сотталушыға 252 000 теңгені және 34000 теңгені бөлек-бөлек аударған. Осылайша, әйел ерлі-зайыптылардан егіз бала үшін жалпы сомасы 546 000 теңге алған», – делінген сот хабарламасында.
Бұдан кейін тараптар нотариусқа барып, биологиялық анасы егіз сәбиді асырап алуға және кейіннен оларды қамқорлыққа алуға келісімін берген.
Іс бойынша сотталушыларға қатысты үкім шығарылды. Егіз баланың анасы 8 жылға, ал ерлі-зайыптылар 2 жылға бас бостандығынан айырылды.