Қасиетті Қазығұрт жері Өзбекстан құрамына кіріп кеткен бе?
Аудандағылар басқаша идеология жүргізуге бел шеше кіріскен сияқты
Түркістан облысы Қазығұрт ауданында Наурыз тойы өзбекше әуенмен басталды. Бұл да аудандағы ерекше орын алған «жаңалық» деп түсіндік.
Алғашқыда қазақтың Әз Наурызына қонақ болып келдік деп ойласақ, бірақ өзбек ағайындардың керней-сырнайына, сахналық көрінісіне тап болып, бөгде елде жүргендей әсерде қалдық.
Өзбек ағайындар бауырмал, тату-тәтті тұратын көршіміз. Олардың салт -дәстүрін сыйлаймыз, құрметтейміз.
Дегенмен, өзбекше музыка, өзбекше сахналық қойылымдар көрсетіліп, айналаға өзбекше тамаданың даусы жаңғырып естіліп тұрғаны кімге болса, таңданыс туғызды. Идеологиядан хабары бар ма, жоқ па аудан әкімі Азизхан Исмаилов та осы көріністерді тамашалап мәз болып тұрғанын байқадық.
Бұл өңірде радио әуені де тұрақты түрде өзбекше жаңғырып тұратынын жұрт жақсы біледі.
Оны өзгертуге , қазақша ақпарат алуға жоғары не жерлікті атқарушы биліктің қауқары жоқ. Болмай тұрғанын байқап жүрміз.
Шынын айтқанда, өзбекше идеологияны жандандыруға келгенде, Қазығұрт ауданының жергілікті атқарушы билігі жан тәнімен кірісіп кеткені таңдандырды.
Облыс әкім Дархан Сатыбалды мен облыстың идеология саласына жауапты әкім орынбасары Бейсен Тәжібаев ұйықтап отырмай, айналасында қоластындағылар кімдер қандай тіршілік жасап жатыр, қандай саясат жүргізіп отыр деп бір қарап қойса болады ғой.
Қазақтың идеологиясын төрт аяғында тік тұрғыза алмай жатқанымызда, көршіге қарап көз қысып, көсегеміз көгере қоймас деймін.
Балтабек ТҮЙЕТАЕВ,
Түркістан облысы
