USD
АСТАНА. 23 ақпан. Оқу-ағарту министрлігі оқушылардың сыныпта намаз оқуларын ұйымдастырып берген мектепті тауып алып, тиісті жазаға тартады. Бұл туралы El.kz ақпарына сілтеме жасаған rast.kz хабарлайды.
Әлеуметтік желіде тараған бейнежазбада бір топ оқушының сәждеге жығылып жатқаны түсірілген. Видеодан мектеп партасы көрініп тұр. Спорттық киім киген бозбалалар емін-еркін намаз оқып жатыр. Бірақ оның қай мектепте орын алғанын анықтау қиын.
Оқиғаның қай өңірде болғаны да беймәлім. Жалпы заң бойынша оқу орындарында діни құлшылық жасауға тыйым салынған. Білім басшылары сабақ барысында құлшылық жасауға рұқсат берген білім ошағын анықтап, шара қолданбақ.
Оқу-ағарту министрі Ғани Бейсенбаев республика мектептерінде намазхана ашуға рұқсат берілмейтінін кесіп айтты.
«Мектеп ең алдымен – білім мен тәрбиенің ордасы. Мектепте мұғалімдер балаларды оқытуы тиіс. Біз мұны ұдайы айтып келеміз. Осы позициядан айнымаймыз. Сондықтан ондай оқыс әрекеттерге жол бере алмаймыз», – деді министр.
