Зеленьский доғарысқа кеткен Залужныйға Украина қаһарманы атағын берді
КИЕВ. 9 ақпан. Украина президенті Володимир Зеленьский Қарулы күштердің бұрынғы қолбасшысы Валерий Залужныйды Украина қаһарманы атағымен марапаттады. Бұл туралы The Moscow News дерегіне сүйенген ras.kz хабарлайды.
«Жеке өзінің Украинаның мемлекеттік егемендігі мен территориялық тұтастығын қорғауда, украин халқына қызмет етуде көрсеткен жанқиярлық ерлігі үшін», – деп атап көрсетілген награданың себебі мемлекеттік сайтта жарияланған хабарламада.
Құжатқа Зеленьский Залужныйды доғарысқа жіберу туралы жарлық шығарған 8 ақпанда қол қойылған.
Келесі жарлықпен Украина Қарулы күштері бас барлау басқармасының бастығы Кирилл Будановқа Украина қаһарманы атағы берілген.
Украина президенті бұрынғы бас қолбасшының неліктен армия басшылығынан кетуіне тиісті болғанын түсіндіріп берді. Ол мұны жарлық шықпай тұрған кезде-ақ бірнеше рет айтқан болатын. «Бәрі жаңа нақты жағдайға қарай өзгеріп, бейімделуі тиіс», – деді Зеленьский. Бас қолбасшымен бірге, армиядағы жоғары команда түгелге жуық өзгеруі қажет. Осылай әскери басшылық алмасады. Бригада командирлері жоғары басшылықты өз қолдарына алады.
Жалпы, Залужныйдың доғарысқа кететіні жайлы әңгіме өткен жылдың жазынан бері айтылып келе жатқан. Бұған Запорожье облысы мен Донецк облысының оңтүстігінде жазғы қарсы шабуылдың сәтсіз өткізілгені негізгі себеп болды. Осыдан кейін мемлекет басшысы мен бас қолбасшының өзара қарым-қатынасына сызат түсе бастады.
Президенттің мәліметінше, Залужныймен кездесу кезінде Ресеймен соғыстың «нақты қадамдары мен стратегиясын өзгерту қажеттелігі жөнінде шешім қабылданған». Мәселе бір адамды ауыстыруда емес, әскери басқару құрылымын түбегейлі өзгертуде болып отыр. Сонымен бірге кездесуде генералға «команда сапында қала беру» ұсынылған.
Украина Қарулы күштерінің бас қолбасшысы лауазымы генерал-полковник Олександр Сырьскийге тапсырылды. Ол 1965 жылы шілде айында Ресейдің Владимир облысында туған. Ұлты – украин. Әкесі саналы өмірі бойы әскери қызмет атқарған. Қазір әкесі мен шешесі және інісі РФ-да тұрады. Өзі Украинаға 1986 жылы Мәскеу жалпы командалық әскери училищесін бітірген бойда келген. Жаңа тағайындауға дейін Украина жаяу әскерлерінің қолбасшысы болған. Ол Украина армиясы сапындағы жалғыз генерал-полковник, яғни әскери шені ең жоғары адам. Ал Валерий Залужный генерал-майор еді. Ортада әлі генерал-лейтенант деген атақ бар.
Сырьский 2022 жылы Киевті қорғаудағы ерлігі мен ол жақтан Ресей басқыншыларын түре қуып шыққаны үшін Украина қаһарманы атағын алған болатын. Әскердегілер оны өз адамдарын қауіп-қатерге аямай салатын советтік кейіптегі қатал әскербасы деп есептейді. Сол үшін «қасапшы», «генерал-200» деген лақап аттар алған екен. Бұл қауесеттің бәрін Ресей таблоидтары жазып жатыр. Әлбетте, олар жаңа бас қолбасшыға жаулық көзқараспен қарайды. Ал қалғанын алдағы өмір көрсетеді.
