Шымкент пен Павлодарда жұртты бопсалап жүрген екі топтың мүшелері ұсталды
АСТАНА. 26 қаңтар. Ішкі істер министрлігінің қызметкерлері Шымкент пен Павлодарда жұртты бопсалап жүрген жастар топтарын құрыққа түсірді. Бұл туралы Polisia.kz ақпарына сүйенген rast.kz хабарлайды.
Полиция ведомствосы жастар арасында, оның ішінде кәмелетке толмағандар арасында криминалитет және «ұры» («вор») идеологиясы ықпалына жол бермеу жөніндегі кешенді шаралар қабылдап жатыр.
23 қаңтарда Шымкент және Павлодар қалаларында жедел-іздестіру іс-шараларын жүргізу барысында бопсалауларға, тонауларға, алаяқтықтарға, бас бостандығынан заңсыз айыруға қатысы бар екі жастар тобы ұсталды.
Павлодар облысы полиция департаменті ұйымдасқан қылмысқа қарсы күрес басқармасының жедел әшкерелеу орбитасында 18 жастан 23 жасқа дейінгі аралықтағы бес жас жергілікті тұрғыннан құралған топ болды.
«Күдікті адамдар криминалдық идеологияның ықпалымен өздерінің құрдастарын оқу орындары мен жатақханаларда, сондай-ақ сауда ойын-сауық орталықтарында қорқыту және күш қолдану арқылы онлайн-қосымшалар арқылы несиелер ресімдеуге мәжбүрлеген, содан кейін ақша және тауарларын алған. Оларға бопсалау, тонау және алаяқтық қылмыстары бойынша айып тағылды. Қылмыстық топтың барлық қатысушылары ұсталып, уақытша ұстау оқшаулағышына қамалды», – деді ҚР ІІМ ұйымдасқан қылмысқа қарсы күрес департаментінің басқарма бастығы Қуандық Алпыс.
Дәл осыендай жағдайр Шымкент қаласында да қайталанды. Ондағы операция барысында 24 жасқа дейінгі алты адамнан тұратын жастар тобының қылмыстық әрекетінің жолы кесілді.
«Фигуранттар өздерін полиция қызметкері ретінде таныстырып, өздерінің құрбандарын қорқыту, ұрып-соғу және бас бостандығынан заңсыз айыру арқылы ірі көлемдегі қаражат бопсалаған. Қылмыстық топтың барлық қатысушылары ұсталып, уақытша ұстау оқшаулағышына қамалды», – деді Қуандық Алпыс.
Қазір аталған фактілер бойынша Шымкент қаласы және Павлодар облысы полиция департаменттерінің тергеу органдары сотқа дейінгі тергеп-тексеру жүргізіп жатыр.
Ұсталған адамдарға үш жылдан жеті жылға дейінгі мерзімге бас бостандығынан айыру түріндегі жаза қолданылады.
