«Қайсар» бас жаттықтырушы Кумыковқа қатысты қауесетке нүкте қойды

ҚЫЗЫЛОРДА. 19 қаңтар. Қызылорданың «Қайсар» футбол клубы бас жаттықтырушы Виктор Кумыковтың қызметінен кеткені жайындағы алып-қашпа сөзді теріске шығарды. Бұл туралы vesti.kz ақпарына сүйенген rast.kz хабарлайды.

«Бас жаттықтырушы «Қайсардағы» қызметін жалғастырады. Республикалық спорт порталдарында жазылып жатқан Кумыков «Қайсардан» кетеді-міс деген ақпарат негізсіз екенін жеткіземіз. Бүгінде Виктор Балютович Түркияда қасқырларды жаңа маусымға дайындауда», – делінген клуб хабарламасында.

Еске сала кетейік, Виктор Кумыков «Қайсарды» өткен жылдан бері жаттықтырып келеді. Қызылорда футбол командасы 2023 жылғы маусымда оның жетекшілігімен премьер-лигада 6-орын алды және Қазақстан кубоігінен 1/8 финал кезеңіне дейін барды.

Команда бұрнағы күні Анадолы жерінде Украинаның Полтава қаласының «Ворскла» ұжымымен жолдастық кездесу өткізіп, 1:4 есебімен жеңіліп қалды.