«Назарбаева – Сатаев» тандеміне 400 млн теңгені қолды етті деген күдік таңылды
АЛМАТЫ. 26 желтоқсан. Кезінде «Қазақфильмнің» басшысы болған режиссер Ақан Сатаев пен экс-президенттің кенже қызы Әлия студияға фильм түсіруге бөлінген қаржының 400 млн теңгесін жымқырған деген күдікке ұшырап отыр. Бұл туралы DalaNews.kz дерегіне сілтеме жасаған rast.kz хабарлайды.
Әуелгіде Алматы прокуратурасының «Қазақфильмге» бюджеттен бөлінген 400 млн теңгенің қолды болғанын анықтағаны айтылған. Бірақ онда ұрланған қаражаттың қандай фильмді түсіруге бөлінгені ашып көрсетілмеген екен.
Дегенмен, DALA INSIDE телеграм-арнасы әңгіменің «Ұлы дала таңы» фильміне қатысты қозғалып жатқанын анықтай алды.
Телерграм-арна бұған дейін режиссер Ақан Сатаевтың:«Құны 4 миллиард теңгеден асатын (8,6 млн доллар) ауқымды жобаны аяқтадым», – деп жазғаын еске салады. Ол дәл сол тұста киностудия басшысы болатын.
Ал 2022 жылы экранға шыққан «Ұлы дала таңы» картинасының продюсері Әлия Назарбаева болғанын Kinopoisk порталы атап көрсеткен болатын.
Шынын айту керек, «Сатаев пен Назарбаева» тандемі «Ұлы дала таңынан» да бөлек бірнеше жобаларды бірігіп атқарған. Олар 2020 жылы Ақан Сатаев «Қазақфильмнің» президенті болып тағайындалғанға дейін-ақ тығыз жұмыс істесе бастаған екен. Айталық,
Әлия 2019 жылы Сатаев түсірген «Томирис» тарихи фильмінің бас продюсері және сценарий авторларының бірі болған. DALA INSIDE-тың мәліметінше, Назарбаеваға осы лентаның сценариі үшін 149 миллион теңге төленіпті.
«Қазақфильммен» жасалған келісімге сәйкес, ол (Назарбаева, ред.) автор ретінде телеарнадағы прокаттан түскен пайданың 60 пайзын, ел кинотеатрларында прокаттан түскен табыстың 70%-ын және республикадан тыс кинотеатрларда көрсетілген прокаттың 40 пайызын алуға құқылы болған.
«Томиристі» түсіру үшін мемлекет 3 миллиард теңгеден астам қаржы жұмсаған.
Назарбаева продюсерлік еткен «Томирис» фильмін сол тұстағы Мәдениет және спорт министрлігінің тапсырысы бойынша «Сатайфильм» компаниясымен бірлестікте «Қазақфильм» киностудиясы түсіреді.
Сатаев пен Назарбаеваның «Анаға апарар жол» кинодрамасы мемлекеттік сыйлыққа ие болды.
Айта кету керек, жақында Антикор «Көшпенділер» фильміндегі бекініс сатып алу транзакциясының құнына қатысты деректің шетін шығарған. Оны бұрынғы Мәдениет министрі Арыстанбек Мұхамедиұлына қатысты компания сатып алған болып шықты. Яғни, 2017 жылы жалған бекініс салынғаннан 44 есе арзан бағаға сатылған.
Антикор бұл қылмыстық іске экс-министрдің қатысы бар-жоғын тексеріп жатқанда, «Қазақфильмнің» бұрынғы басшысына қатысты тергеу амалдары да басталды.
«Белгілі режиссер фильмдеріне Назарбаевтың кіші қызын бас продюсерлікке тарту арқылы Әлияны берік «қамал» ретінде пайдаланды ма? Бәлкім, екеуі әу бастан сыбайлас шығар, кім білсін?» – деп жазады осы ретте DalaNews.kz.
