Тасмағамбетов Арменияның ҰҚШҰ-дан көмек алудан бас тартқанын баяндады
ЕРЕВАН. 20 қараша. Армения билігі Ұжымдық Қауіпсіздік Шарты Ұйымынан (ҰҚШҰ) күн тәртібінен өзіне көмек көрсету жөніндегі құжатты алып тастауды өтінді. Бұл туралы The Moscow News дерегіне сілтеме жасаған rast.kz хабарлайды.
Мұны Минскіде Беларусь президенті Александр Лукашенкомен кездесуінен кейін ҰҚШҰ-ның бас хатшысы Иманғали Тасмағамбетов мәлімдеген деседі.
Осыған орай БелТА оның сөзінен дәйектеме келтіреді. «Армян тарапы, басқа қалған одақтастары шешімді толық қолдағандарына қарамастан, бұл құжатқа ешқандай қызығушылық танытпады, бұған қоса, біздің жұмысымыздың аяқталу кезеңінде олар мұны күн тәртібінен мүлде алып тастауды өтінді», – деді бас хатшы.
Хайастан (Армения) премьер-министрі Никол Пашинян (суретте) 2022 жылғы қарашада Ереванда өткен ҰҚШҰ саммитінде Ұжымдық қауіпсіздік кеңесінің Арменияға көмек көрсетуді ұсыну жөніндегі бірлескен шаралары туралы шешіміне қол қоюдан бас тартқан болатын. Бұдан кейін ҰҚШҰ-ның сол кездегі бас хатшысы Станислав Зась тұйықтан шығудың амалы ретінде құжаттың толықтыруды қажет ететін тұстары бар екенін алға тартты.
2023 жылы Ұйымның төраға елі қызметін Беларусь атқаруда. Оның құұрамына сондай-ақ Ресей, Қазақстан, Қырғызстан және Тәжікстан кіреді. Алдағы 22-23 қараша күндері Минскіде ҰҚШҰ-ның саммиті, қорғаныс министрлерінің кеңесі өткелі жатыр. Оған Никол Пашинян қатыспайтынын бұдан бұрын жариялап қойған болатын. Ол соның алдында Бішкекте өткен жиынға да ешбір нақты себепсіз бармай қалған еді.
