USD
БАКЫ. 30 қыркүйек. Әзербайжан күштік құрылымдары Қарабақтағы мойындалмаған республиканың бұрынғы басшыларын тұтқындауды жалғастыруда. Бұл туралы «Радио Азатутюн» радиосы ақпарына сілтеме жасаған rast.kz хабарлайды.
Кеше мойындалмаған мемлекеттік құрылымның 2015-2018 жылдарғы «қорғаныс министрі» болған Левон Мнацаканян шекарадан Арменияға қарай өтіп кетпек болған жерінде ұсталып, Бакы қаласына жеткізілді.
Сондай-ақ 27 қыркүйекте мойындалмаған республика армиясы қолбасшысының бұрынғы орынбасары Давид Гегамян да қолға түсті. Оған Қарабақта теракт ұйымдастырды деген күдік ілініп тұр.
Бұдан бұрын мойындалмаған Арцах республикасының шенеуніктері басылымға өздерінің Самвел Шахраманян деген президенті әскери-саяси басшылықтың Қарабақтан қауіпсіз шығып кетулері жөнінде әзербайжан тарапымен келіссөз жүргізіп жатқанын баяндаған еді. Кейін белгілі болғанындай, Бакы жағынан мұндай келіссөзге ешкім де қатыспапты.
Қазір анонимді мәнбелер Қарабақтың үш бұрынғы «президенті», сондай-ақ «сыртқы істер министрі» және Шахраманянның кеңесшісі Давид Бабаян ұзамай қамауға алынатындарын жеткізді.
Бұдан бұрын Арменияға барар жолда «үкіметтің» бұрынғы басшысы, ресейлік миллиардер Рубен Варданянның ұсталғаныы хабарланған болатын. Ереван оның босатылуын талап етуі мүмкін.
Тағы бір белгілі болғаны: әзербайжан тарапы Қарабақтағы сепаратизм отын қоздырушы 200-ге жуық адамның үстінен қылмыстық іс қозғайтын болады.
Еске сала кетейік, сәрсенбі күні Қарабақтың президенті деген лауазым алып алған Шахраманян мойындалмаған республиканың барлық мемлекеттік органдарын 2024 жылдың 1 қаңтарына дейін тарату жөніндегі жарлыққа қол қойғаны белгілі болды. Бірақ Әзербайжан билігі бұл жарлық тұрмақ, мұндай республиканың болғанын да, оның осындай президенті бар екенін де мойындап отырған жоқ.
Бакы Қарабақта қалып, әзербайжан билігімен интеграцияға түскілері келетін армяндарға ондай мүмкіндік бермекші. Бұған келіспейтіндеріне әзербайжан жерін тастап шыққаннан басқа ештеңе қалмайды.
Айтқандай, Қарабақта тұрып келген 120 мыңнан аса армяннан қазірге дейін 100 мыңға жуығы Арменияға кетіп қалған. Осыны пайдаланған армян билігі БҰҰ-ға «армяндарды қудалап жатыр» деген желеумен Әзербайжанның үстінен шағым тастап үлгерді. Қазір ұйымның комиссиясы Қарабаққа келіп, тексеруді бастап кетті.
