Әзербайжанның Қарабақ өңіріндегі сепаратистік құрылым өзін өзі таратты
БАКЫ. 28 қыркүйек. Әзербайжанның Қарабақ өлкесіндегі мойындалмаған «Таулы Қарабақ республикасының» сепаратистік құрылымы өзін өзі таратқанын жариялады. Бұл туралы Oxu.az ақпарына сүйенген rast.kz хабарлайды.
Арменияның бұқаралық ақпарат құралдары хабарлағандай, Әзербайжан республикасының территориясында заңсыз құрылған құрылымның «президенті» Самвел Шахрамян 2023 жылғы 19 қыркүйектен кейін қалыптасқан жағдайдан туындайтын іс-әрекеттер жөніндегі «жарлыққа» қол қойыпты.
Осы «жарлыққа» сәйкес, мұндай шешім Ресейдің бітімгер контингентінің Әзербайжан республикасының орталық билігімен жасасқан араағайындық келісіміндегі шарттар есепке алына отырып шығарылған. Онда Қарабақ тұрғындарының, сондай-ақ әскери қызметкерлердің қаруларын тапсырғаннан кейін өз дүние-мүліктері тиелген көліктермен Лачын жолымен еркін және кедергісіз шығып кетулеріне мүмкіндік берілетіні айтылған.
Осы «құжатқа» сәйкес, сепаратистік режим құрған барлық заңсыз мекемелер мен ұйымдар 2024 жылғы 1 қаңтарға дейін толық таратылады, ал режимнің өзі осы датаға шейін өзін өзі таратып бітеді.
Бұған қоса, Қарабақтың ұлты армян тұрғындары Әзербайжан республикасы ұсынатын қайта интеграциялану шарттарымен танысулары керек. Ондағы мақсат олардың Қарабақта бұдан ары қалу немесе қалмау мәселесі ерікті және жеке түрде шешулерін қамтамасыз ету болмақ.
Мұның алдында Қарабақ сепартистері үкіметінің басшысы, бұрынғы ресейлік миллиардер Рубен Варданян тұтқынға алынды. Ол әзірге 4 ай мерзімге құлып астына отырғызылды. Оған осы аралықта Қарабақтағы қылмыстық әрекеттеріне орай айып тағылатын болады.
