USD
ФЕРҒАНА. 19 қыркүйек. Өзбекстанның Ферғана облысында қолында баласы бар әйелді теуіп қалған патруль-пост қызметкері жұмыстан шығарылды. Бұл туралы kun.uz ақпарына сүйенген rast.kz хабарлайды.
Мұның алдында қолында емізулі баласы бар, қара хиджап киіп алған келіншекті артынан теуіп қызметтік көлігіне отырғызып жатқан полиция қызметкерінің әрекеті түсірілген видео әлеуметтік желіге тараған еді.
Өңірлік ішкі істер басқармасындағылар жол бойында қайыр-садақа сұрап жүрген әйелдің полиция қызметкерлеріне «аянбай қарсылық көрсетіп, баласын жерге лақтырып жібермек» болғанын баяндады. Содан кейін патруль-пост қызметкерлеріне оны көлікке күштеп отырғызуға тура келген. Рас, сол кезде тәртіп сақшыларының бірі келіншектің артынан теуіп жібереді.
Ферғана облысында осы инцидентке байланысты қызметтік тексеру жүргізілді. Онда полиция қызметкерінің әйелді машинаға күштеп отырғызу кезіндегі дөрекі қылығы қаралды. Ішкі істер басқармасының ақпары бойынша, тәртіп сақшысы осы әрекеті үшін атқарып отырған қызметінен босатылған.
Оқиға 18 қыркүйек күні орын алған. Екі патруль-пост қызметкері сол күні Ферғана қаласындағы Ислам Каримов көшесі мен Кувасай көшесінің қиылысында қызметтерін атқарып тұрған.
Ішкі істер басқармасының барлық қызметкерлері қызметтік этикаға сәйкес келмейтін мұндай дөрекі әрекеттерге бармаулары керектігі жөнінде қатаң ескертілді.
