Астанада Сыр бойы еңбеккерлерінің ауылшаруашылық жәрмеңкесі өтуде

АСТАНА. 16 қыркүйек.  Бүгін Астанада облысы Қызылорда облысы тауар өндірушілерінің қатысуымен ауыл шаруашылығы өнімдерінің дәстүрлі жәрмеңкесі басталды. Бұл туралы Қызылорда облысы қоғамдық даму басқармасының дерегіне сүйенген rast.kz хабарлайды.

Екі күнге созылатын «молшылық керуені» ертең кешке өзінің мәресіне жетеді.

Жәрмеңкеде аймақта өндірілетін отандық өнімдерге қолдау көрсету мақсатында арнайы ауыл шаруашылығы өнімдерінің көрмесі ұйымдастырылды. Онда Сыр диқандары мен тауар өндірушілері 50 жүк автокөлікпен жалпы құны 200 млн теңгені құрайтын 500 тоннаға жуық өнім ұсынуда.

Арқа төріндегі тұрғындарға 85 жылдық тарихы бар Қызылорда облысының брендіне айналған ақ күріші, балығы мен ас тұзы, қауын мен қарбызы, ұлттық сусындары жеткізілді. Сырбойылықтар жәрмеңкеге 135 тоннадан астам күріш, 10 тонна ет, 30 тоннаға жуық балық, 30 тоннадай көкөніс пен жеміс-жидек, 260 тонна бақша өнімдерін, 3 тонна ас тұзын, 10 тоннадай сүт өнімдерін, 5 тоннаға жуық сөк, талқан және кондитер өнімдерін әкелді.

Жәрмеңке елордалықтарға ерекше көңіл-күй сыйлау мақсатында Сыр елі өнерпаздарының концертімен ұштасып жатыр.