USD
ҚЫЗЫЛОРДА. 5 қыркүйек. Бүгін Қызылорда қаласында Тілдер күніне арналған «Тіл – татулық тірегі» атты фестиваль қанат жайды. Бұл туралы облыстық қоғамдық даму басқармасына сілтеме жасаған rast.kz хабарлайды.
Қазақ тіл білімі мен әдебиеттану ғылымдарының негізін салушы, ұлт ұстазы Ахмет Байтұрсынұлының туған күнімен орайластырылған Қазақстан халқы тілдерінің күні мерекесі Cыр өңірінде жоғары деңгейде өтті.
«Тіл – татулық тірегі» атты облыстық фестиваль «Ұлттың сақталуына да, жоғалуына да себеп болатын нәрсенің қуаттысы – тіл» деп ұлағатты сөз қалдырған, Алаш арысы Ахмет Байтұрсынұлы жайлы мазмұнды бейнероликпен басталып, әрі қарай «Ахмет Байтұрсынұлының монологы» атты арнайы әзірленген прологпен жалғасты.
Шарада облыс әкімі аппаратының басшысы Шахмардан Байманов құттықтау сөз сөйлеп, облыстағы бірқатар тіл жанашырлары мен сала мамандарын облыстың Құрмет грамотасымен, облыс әкімінің, ҚР Ғылым және жоғары білім министрінің, Тіл саясаты комитетінің Алғыс хаттарымен марапаттады.
Сондай-ақ, дарабоз ақын, үш мәрте «Алтын домбыра» иегері Мұхтар Ниязов Қырғыз елінің егемендігі мерекесі аясында ақын Молдо Нияз Эрназар Уулуның 200 жылдығына арналған халықаралық ақындар айтысында Бас жүлдені жеңіп алды. Осы ретте жерлесіміздің лайықты жеңісі мен алған марапатымен құттықтай отырып, аймақ басшысының ұлт тілін ардақтаудағы ерекше үлесіне арналған Алғыс хаты табысталды. Бұдан соң Халықаралық «Қазақ тілі» қоғамы қоғамдық бірлестігі Қызылорда облыстық филиалының төрағасы Сәдуақас Аңсат сөз сөйлеп, «Мемлекеттік тіл және БАҚ» облыстық байқауының жеңімпаздарын және мемлекеттік тілді дамыту бағытында белсенділік танытып жүрген және облыс тұрғындарына қазақ тілінде сапалы қызмет көрсетіп отырған тіл үздіктерін «Үздік этномәдени бірлестік», «Тіл жанашыры», «Үздік қазақтілді кәсіпкерлік нысан», «Үздік қазақтілді қаржылық ұйым», «Үздік қазақтілді ас мәзірі», «Үздік қазақтілді кәсіпкер», «Үздік қазақ тілді нотариус» номинацияларымен марапаттады.
Фестиваль барысында жиналған қауымға мерекелік шашу ретінде әзірленген концерттік бағдарлама ұсынылып, шара «Жаса, жаса, қазақ тілім!» әнімен аяқталды.
