USD
МӘСКЕУ. 24 тамыз. «Вагнер» компаниясының құрылтайшысы Евгений Пригожиннің Тверь облысында құлаған ұшағын РФ-ның әуе шабуылына қарсы жүйесі атып түсірген болып шықты. Бұл туралы The Moscow News ақпарына сүйенген rast.kz хабарлайды.
Financial Times басылымының жазуынша, өз мәнбесіне сілтеме жасаған батыстың бір шенеунігі осылай деген. Бірақ ол бортта Пригожиннің болған-болмағанын ашып айта алмаған, бірақ «Путин тұтқынға адам алмайды» дегенді айтқан.
The Moscow Times басылымына оның Ресей билігіндегі өз мәнбесі Embraer ERJ 135 бизнес-джетінің Владимир Путиннің Валдайдағы резиденциясына жақын, оны күзететін С-300 қаруының төрт дивизионы тұрған жерде құлағанын баяндаған.
Ұшақ резиденциядан небәрі 50 шақырым маңда опат болған. «Оның қалай құлағанына қараңыздаршы, – дейді мәнбе. – Оны тек атып түсірген. Ұшақ тек планерін жоғалтып алған».
«Егер Пригожин шынында құлаған ұшақтың ішінде отырған болса, мұны оның маусым айындағы өзі «әділеттілік маршы» деп атаған бүлігімен байланыстыра қарастыру қажет», – деді The Moscow Times-тың Кремльге жақын келесі мәнбесі.
«Куженкино деревнясына жақын маңдағы апат болған жерде жүргізілген іздеу жұмыстары түнгі сағат 23:00-ге таяу аяқталды, онда қатты күйіп қалған 10 адамның сүйегі табылды, біреуінің басы жұлынып кеткен, екіншісі мылжаланып қалған», – деп жазды Baza.
Росавиация артынша бортта болған жолаушылардың тізімін жариялады, олардың арасында Пригожин мен оның орынбасары Дмитрий Уткин бар. Reuters-дің мәліметінше, 24 маусымда Мәскеуге қарай жол тартқан колоннаны ГРУ-дың бұрынғы подполковнигі Уткин басқарып барыпты.
Пригожиннің қаза тапқанын «Вагнерге» жақын Grey Zone телеграм-каналы растап отыр. Журналист Александр Захаровтың ақпары бойынша, «шефтің» қаза тапқанын Пригожин құрылымының қызметкерлері де мойындайды.
РБК агенттінің құқық қорғау органдарындағы мәнбесі тергеу-тексерудің апатқа себеп ретінде ұшудағы қателік, техникалық ақаулықтар және сырттан шабуыл жасау деген үш болжамды қарастырып жатқанын жеткізген.
Тағы бір айта кететін жайт, кейін апат болған жерден Еагений Пригожиннің ұялы телефоны табылған.
Сонымен бірге, қазір 62 жастағы Евгений Пригожиннің өліміне РФ диктаторы Владимир Путиннің тікелей қатысы бар екенін айтылып жатыр. Ол осылайша «Вагнер» жеке әскер компаниясының құрылтайшысынан маусым айындағы әскери бүлігі үшін кек қайтарып, есеп айырысып отыр деседі. Борттағы қалған жолаушылар да «Вагнер» мүшелері болып шықты. Атап айтқанда, бортта бұлардан бөлек, Сергей Пропустин, Евгений Макарян, Александр Тотмин, Валерий Чекалов, Николай Матюсеев және экипаждың үш мүшесі: әуе кемесінің командирі Алексей Левшин, екінші пилот Рустам Каримов, бортпроводник Кристина Распопова болған.
Росавиация мәліметі бойынша, Пригожиннің RA-02795 борт нөмірлі Embraer ERJ 135 ұшағы әуе кеңістігін пайдалануға рұқсат алу негізінде аспанға ұшып шыққан. Демек, ол атып түсірілген болса, осыған қатысты арнайы бұйрық берілген.
