Украина әскерлері майданның барлық шебінде басымдық алып жатыр
КИЕВ. 25 шілде. Украина Қарулы күштері өткен тәуліктегі қарсы шабуылдары барысында Донецк облысындағы майдан шептерінің барлығында да айтарлықтай табыстарға жетті. Бұл туралы «Диалог.UA» ақпарына сүйенген rast.kz хабарлайды.
Америка соғысты зерттеу институты (ISW) Донбастағы Ресей армиясының Бахмут бағытында Украина Қарулы күштерінің қатты қысымында қалып тұрғанын жазды.
Отанын қорғаушы ержүрек украин жауынгерлері кеше Донбастағы қарсы шабуыл операциясы шеңберінде ресейлік оккупанттарды майданның Бахмут бағытындағы Андреевка позициясынан қуып шықты. Институт аналитиктері мұны Украина бас штабы мәліметіне сүйене отырып таратты. Америкалық сарапшылар украиндардың қосымша бірнеше алдыңғы учаскелерде жеңіске жеткендерін атап өтті.
Жарияланған деректерге сәйкес, Украина Қарулы күштері Орехово-Васильки бағытында ілгері жылжып, сондай-ақ Клещеевканың оңтүстік шетіне шығуға жол тапқан. Бұлардың соңғысында украиндар ресейлік десанттардың тас-талқанын шығарды.
Қазір Бахмуттың оңтүстік қапталында кескілескен ұрыс қимылдары жүруде. Ол украиндар тарапынан осы жердегі биікті алу ғана емес, сонымен бірге елді мекенді толық азат ету үшін де болып жатыр. Егер Бахмут алынса, бұл Ресей гарнизоны үшін елеулі жеңіліс болар еді.
Украиндар Донецк обылысының Старомайорск селосын да жау қолынан тартып алды. Ол өте маңызды түйін саналады.
