USD
АСТАНА. 29 маусым. Бас прокурордың орынбасары Ұлан Байжанов активтерді қайтару жөніндегі заңның бұрынғы президент Нұрсұлтан Назарбаевтың төңірегіне де қатысы бар екенін айтты. Бұл туралы ҚазТАГ дерегіне сүйенген rast.kz хабарлайды.
«Заңда субъектілердің критерийлері өте нақты анықталған. Егер бұл сіз атап отырған фамилия (Назарбаевтар – ҚазТАГ) жайына келсек, онда бұл отбасы мүшелері осы өлшемдерге сәйкес келеді, сондықтан, әрине, бұл заң оларға да қолданылады», – деді Ұлан Байжанов бейсенбі күні Сенат сыртында.
Оған сондай-ақ осы мәселе бойынша соттың шешімі шығып қойғандар арасында Назарбаевтың туған-туыстары мен олигархтардың бар-жоғы жайлы сұрақ қойылды.
«Бізде қазір Қайрат Сатыбалдыға (Нұрсұлтан Назарбаевтың туған інісі Сатыбалды Назарбаевтың баласы – rast.kz) қатысты қылмыстық іс тұр, Қайрат Боранбаевқа (Дариға Назарбаеваның бұрынғы құдасы – ҚазТАГ) қатысты іс соңына дейін жеткізілді, осы істердің аясында көптеген активтер қайтарылды», – деді бас прокурордың орынбасары.
Сөз орайында Ұлан Байжанов активтерді қайтару кезінде «Панама ісі» де, басқа мәнбелер мәліметтері де ескерілетініне сендірді.
Еске сала кетейік, 29 маусым күні сенатта «Заңсыз иемденілген активтерді мемлекетке қайтару туралы» және «Қазақстан Республикасының кейбір заңнамалық актілеріне заңсыз иемденілген активтерді мемлекетке қайтару мәселелері бойынша өзгерістер мен толықтырулар енгізу туралы» заңдар мақұлданды. Бұған дейін, 20 маусымда Сенат пен Мәжілістің біріккен отырысында «Прокуратура туралы заңға» елден шығарылған активтерді қайтарудың тетіктетері енгізілген өзгерістер қолдау тапқан еді.
