Өткен жылы Сыр өңіріне 400 млрд теңгеден аса инвестиция тартылды
АСТАНА. 7 маусым. Қызылорда облысына 2022 жылы 400 млрд теңгеден астам инвестиция тартылып, аталмыш сала бойынша еліміздің кеуде қатарынан табылды. Бұл туралы Қызылорда облыстық қоғамдық даму басқармасының дерегіне сілтеме жасаған rast.kz хабарлайды.
Қызылорда облысының әкімі Нұрлыбек Нәлібаев Астанадағы Орталық коммуникациялар қызметінде өткен брифингте осының жай-жапсарын тарқатып айтты.
Өңір көшбасшысы өзінің осында жасаған баяндамасында 2022 жылы Сыр бойы аумағында атқарылған жұмыстар мен алдағы уақытта қолға алынатын жобалар жайына кеңінен тоқталды.
«Президент пен Үкіметтің Сыр өңірін ерекше қолдауының арқасында тың жобалар жүзеге асуда. Облыс 2023 жылдың 4 айының қорытындысымен әлеуметтік-экономикалық дамудың макрокөрсеткіштері бойынша оң динамикаға қол жеткізді, – деді Нұрлыбек Машбекұлы өзінің сөзінде. – Ауыл шаруашылығының жалпы өнімі 1,6, өңдеу өнеркәсібінің көлемі 1,9 пайызға, пайдалануға берілген тұрғын үйлер көлемі 2,4, сауда көлемі 2,5, инвестициялар тарту 42,1 және құрылыс жұмыстарының көлемі 44 пайызға артты».
Әкімнің айтуынша, бүгінгі таңда облыс бюджеті 593 млрд. теңгені құрайды, бұл – 2022 жылғы бюджетпен салыстырғанда (387,3 млрд теңге), 205 млрд 700 млн теңгеге, яғни 53 пайызға артық. Бюджеттің 64 пайызы немесе 378,6 млрд теңгесі әлеуметтік салаға бағытталып отыр.
Өнеркәсіп өндірісінің 70 пайызға жуық үлесін алатын тау-кен секторында мұнай өндіру қордың сарқылуы салдарынан 2013 жылдан бері 6,5 млн. тоннаға азайған. Мәселен, 2013 жылы 10,5 млн. тонна мұнай өндірілсе, 2022 жылы оның көлемі небәрі 4 млн. тонна болған.
Қазір жаңа кен орындарын игеру үшін «Шу-Сарысу» бассейнінде жүргізіліп келген геологиялық-геофизикалық зерттеу жұмыстары аяқталып, Арал бассейнінің «Батыс» және «Шығыс» бөлігінде жалғасып жатыр.
Нұрлыбек Нәлібаев бұдан бөлек, өңірде шикізатқа тәуелділікті азайту үшін экономиканы әртараптандыруға бағытталған жобаларды іске асыру жалғасын табатынын баяндады. Атап айтқанда, индустрияландыру аясында өңірде құны 607,7 млрд теңгені құрайтын 34 жоба жүзеге асырылуда. Бұл жобалар 6,3 мың адамды жұмыспен қамтуға мүмкіндік бермек.
«Мемлекет басшысының тапсырмасына сәйкес Жалпыұлттық бірыңғай жобалар пулы қалыптасып, оған құны 907 млрд. теңгеден асатын 36 жоба енгізілді. Өткен жылы құны 5,1 млрд. теңге болатын 4 жоба іске қосылды. Олар – «Үй құрылысы комбинаты», «350 орындық мектепті кеңейту», «Балық өңдеу цехы», «Көкөніс сақтау қоймасы» жобалары. Биыл Сыр өңірінде құны 13,4 млрд. теңгенің 9 жобасы жүзеге асырылады. Бұл өңірге инвестиция тарту қарқынын арттыруға мүмкіндік береді», – деді Қызылорда облысының әкімі бұдан әрі.
Айрықша атап өтуіміз керек, 2022 жылы Қызылорда облысы инвестиция тарту қарқыны бойынша республика көлемінде алдыңғы қатардан көрінді. Өңір экономикасына 409,5 млрд. теңге инвестиция салынып, облыс еліміз бойынша 1-орынға шыққан. Ал биыл өңірге инвестиция тарту көлемін 424 млрд теңгеге дейін жеткізу межеленіп отыр.
