Алматыда «Алтын орда» базары директорының орынбасары ұсталды
АЛМАТЫ. 3 маусмым. Алматыдағы «Алтын орда» базары директорының орынбасары ұсталды. Бұл туралы бірқатар бұқаралық ақпарат құралдарына сілтеме жасаған rast.kz хабарлайды.
Алматының іргесіндегі базардың төңірегінде баяғыдан әңгіме көп. Оның алдын «бұрынғының бауыры» Болат Назарбаевтың меншігінде екені айтылатын. Қазір қожайыны өзгерген сияқты.
Базардың ішкі қалтарыс жағын айтпағанда, сыртқы ауласында да қалыптасқан тәртіп жоқ. Онда көліктер қалай болса солай қойылады, олар жүргіншілерге арналған жолақты алап біткенді басып алып қойып жатады.
Тексерсе, оның ішінде де былық жеткілікті болуы керек.
Базар директорының орынбасарын ұстау кеше, 2 маусымда жүзеге асырылыпты. Соның сәл алдында Қарасай аудандық полиция бөлімінің кезекші бөліміне BMW көлігінде отырған қарулы адамдар туралы ақпар келіп түскен. Олардың арасында «Алтын Орда» әмбебап базары директорының орынбасары да болған.
Полиция баспасөз қызметінің ақпарына қарағанда, ішкі істер органдары бұл дерек негізінде «Қаруды, оқ-дәрілерді, жарылғыш заттарды және жарылғыш құрылғыларды заңсыз алу, беру, өткізу, сақтау, тасымалдау немесе алып жүру» (Қылмыстық кодекстің 287-бабы) бойынша сотқа дейінгі тергеп-тексеру басталған.
Алайда базар баспасөз қызметі қамауға алынған күзетшілердің қару ұстауға рұқсаттары бар екенін айтып отыр.
Басылым базарды рейдерлік жолымен басып алу әрекеті жасалған болуы мүмкін екенін алға тартады.
ҚазТАГ бұдан бұрын онда 300-ден аса тәртіп бұзушылықтың анықталғанын жазған еді. Премьер-министр Әлихан Смайылов базардың іс-әрекетіне бақылау жүргізуді ұйымдастыруды тапсырды.
Еске сала кетейік, 2023 жылғы қаңтарда «Алтын орда» базарының бұрынғы басшылығына алаяқтық ісі бойынша халықаралық іздеу жарияланды.
