РФ «қызыл сызықтың» құнын кетірді, АҚШ Путиннен қорқуды қойды
ВАШИНГТОН. 2 маусым. Ресей «қызық сызықтың» құнын түсіріп алды, АҚШ Путиннің қоқан-лоққысына ешбір пысқырмайтын да болды. Бұл туралы The Moscow News дерегіне сүйенген rast.kz хабарлайды.
Украинадағы соғыс басталғалы бергі бір жарым жылдың ішінде Кремль Батысқа қарап азу тісін ақситып, қаншама рет «жүнін қампайтып» бақты. Мәскеу Батыстың өзіне жақпайтын әрбір әрекеті сайын «соған сай келетін» соққы беретінін немесе шара қолданатынын мәлімдеп отырды. РФ президенті Владимир Путин мен оның қауіпсіздік кеңесіндегі орынбасары Дмитрий Медведев «қызыл сызықтан аттап кеткендері үшін» бірнеше рет Украина мен оның одақтастарын жазаламақшы да болды, бұл екеуі ядролық қарумен соққы жасайтындарын айтып, сан мәрте қоқаңдап көрді, мұнда тағы: «бұл – жай сандырақ емес» деп ескертіп қоюды да ұмытпады.
Бірақ мұндай шабалаңнан кейін де АҚШ тарапынан айылды жиып алу ишараты жасалмады, Пентагон керісінше Украинаны қаруландыруды одан әрі қарқынды жалғастырып, әскери қатынастағы қарапайым заттар саналатын Javelin (танкіге қарсы) мен Stinger (әуе шабуылына қарсы) ракета кешендерінен бастап, M1 Abrams танкісі мен F-16 истребителінің төртінші буынына дейін беруге құмбыл кірісті. Бұлар ақшаға шаққанда, $50 млрд шамасында болады.
«Вашингтонның барған сайын Путиннің қоқан-лоққысын елемеушілігін күшейте түсуінің басты себебі – ол айтқан нәрселерінің бірде-бірін іс жүзінде орындай алған жоқ», – деп түсіндіреді The Washington Post газеті америкалық азаматтық және әскери шенеуніктер пікірлеріне сүйеніп.
Шынында да Ресей басшыларының барлық мәлімдемелері сандырақ болып шықты, бұл АҚШ пен Еуропа елдері лидерлерінің бұрын бастаған әлеуетті әрекеттерін қаннен-қаперсіз жалғастыра беруге деген сенімдерін арттыра түсті.
