USD
АЛМАТЫ. 15 мамыр. Белгілі ақын Олжас Сүлейменов Президентке жазушы Ілияс Есенберлинге Халық қаһарманы атағын беруді сұраған үндеу жолдады. Бұл туралы ҚазТАГ дерегіне сүйенген rast.kz хабарлайды.
Ақын-жазушы Олжас Сүлейменов мұны қазақ тарихының қыртысын қопарып шыққан романшы қаламгердің халықтың нағыз адал перзенті болғанымен байланыстырады.
«Өзіңізге де белгілі, Ілияс Есенберлин күрделі коммунистік режимнің кезінде 20 жылдан астам уақыт бойы тарихи еңбектерді, жылнамаларды, халық эпостары мен аңыздарын терең зерттеу арқылы қазақ халқының ерлікке толы тарихи өткен кезеңі туралы «Көшпенділер» және «Алтын Орда» эпикалық трилогияларын жазып шығып, іс жүзінде азаматтық ерлік жасады. Бұл туындылар, сөз жоқ, қазақ ұлтының және бүкіл Қазақстан халқының тарихи сана-сезімдері қайта жаңғыруына үлкен үлес қосты», – деп жазады Олжас Сүлейменов.
Қоғам қайраткері сонымен бірге кезінде Есенберлиннің туындылары лайықты бағаланбағанын, жазушының шын мәнінде ешқандай марапаттар алмағанын атап өтеді.
Ілияс Есенберлин 1915 жылы Атбасарда туған, 1983 жылы Алматыда қайтыс болған. Бала жасында жетім қалып, балалар үйінде тәрбиеленген. Екінші дүниежүзілік соғысқа қатысып, ауыр жарақат алған. 1951 жылы өзінің үйіне АЛЖИР-де отырып шыққан қайын енесін тұрғызғаны үшін сотталып кетіп, жазасын Түрікменстандағы Қарақұм каналын қазу жұмыстарында өтеген. Кейін одан сотты болғаны алынып тасталған.
Ілияс Есенберлин әдебиеттегі жолын өлең жазудан бастаған, кейінірек, түрмеден босап келгесін негізінен қазақ халқының өткені жайлы тарихи романдар жазуға кіріскен.
Кеңес Одағы кезінде, 1980 жылы «Көшпенділері» Лениндік сыйлыққа ұсынылған. Бірақ Қазақстаннан көре алмаушылар тарапынан қаптап барған арыз-шағымдардың кесірінен бұл атақтан құр қалған.
