Қостанайда қазақтарды қорлаған адамға қылмыстық іс қозғалмады
ҚОСТАНАЙ. 18 сәуір. Қостанайда қазақтарды қорлап, ұлтаралық араздықты қоздырған «майордың» үстінен қылмыстық іс қозғалған жоқ. Бұл туралы ҚазТАГ дерегіне сүйенген rast.kz хабарлайды.
«Оқиға орнына келген патруль алкоголь ішіп мас болып тұрған Қостанай қаласының 45 жастағы азаматын ұстап, оның үстінен Әкімшілік кодексінің 434-бабы 1-бөлігі («ұсақ бұзықшылық») және 73-1-бабы («қасақана жеңіл жарақат салу») бойынша әкімшілік материал жинады», – делінген ішкі істер министрлігінің ресми telegram-каналында.
Инцидентке екінші қатысушы – 45 жастағы ер кісіге сот-медициналық сараптама тағайындалып, оның екінші дәрежелі дене жарақатын алғаны анықталды. Полициядағылар үй жанындағы тұрақта басталған тұрмыстық тартыс-талас барысында жанжал туып кеткенін айтты.
Әлеуметтік желіге тараған видеороликте өзін «гвардия майоры» деп атаған мас ер кісі видео авторымен сөзге келіп, бүкіл қазақ этносын боғауыз сөздермен қорлайды.
Осыдан кейін ол автордық қолынан телефонын жұлып алмақшы болады. Видеода оны полицейдің алып бара жатқаны көрініп тұр.
