Щи Дзиңпиң Қытай армиясын соғысқа дайындап жатыр – БАҚ
БЕЙЖІҢ. 30 наурыз. Қытай көсемі Щи Дзиңпиң бүгін парламенттегі отырыста өз армиясын соғысқа шұғыл дайындауға пәрмен берді. Бұл туралы шетел ақпарат құралдарының дерегіне сүйенген rast.kz хабарлайды.
«Қытай лидері соғысқа дайындала бастады, ол өз генералдарын «ұрыста батыл болуға» шақырды», – деп жазды Американың «Foreign Affairs» басылымы Щи Дзиңпиңнің соңғы сөйлеген бірнеше сөзін негізге ала отырып. Газет Бейжіңнің бұл соғысты Тайваньды басып алудан бастағысы келіп отырғанын атап өтті.
Қытай парламенті мен оның жоғарғы саяси консультативті органының кезекті отырысында Щи өз генералдарын «шайқас кезінде батыл болуға» үндеді. Жалпы, ол соңғы кездері соғысқа дайындалу тақырыбын төрт рет сөйлеген сөзінде көтерді.
Қытай үкіметі сондай-ақ мемлекеттің қорғаныс бюджеті бірден 7,2 пайызға өсірілетінін жариялады. Бұл соңғы онжылдықта бірінші рет оның екі есеге артып отырғанын көрсетеді. Сонымен бірге астықтың шетелдік импортын барынша азайту межеленіп отырғаны да айтылды.
Бұдан бөлек, Бейжіңнің соңғы айларда соғысқа дайындық жөнінде жаңа заңдар қабылдап жатқаны сөз болуда.
Әлем жұртшылығын тағы бір алаңдатып отырған жайт, Қытай бүгін «әділдікті» қорғау үшін Ресеймен бірге «әскери сенімділікті» тереңдету жоспары бар екенін де мәлімдеді. Щи стратегиялық коммуникация мен координацияны күшейту мақсатында Қытай әскери қызметкерлерінің ресейлік әріптестерімен бірге жұмыс істейтінін мәлімдеді.
Мұның алдында АҚШ Қытайдың Украинадағы соғысқа байланысты ұсынып отырған «бейбіт келісімімен» келіспейтінін ашып айтқан болатын. Вашингтонның ойынша, ол Ресейдің біршама уақыт тынығып алып, Украинаға қайта соғыс ашуына жағдай жасап береді.
