Қазақтың екі боксшы қызы әлем чемпионатының финалына шықты
НЬЮ-ДЕЛИ. 23 наурыз. Үндістан астанасында өтіп жатқан әйелдер арасындағы әлем чемпионатының жартылай финалында екі боксшымыз финалға жолдама алды. Бұл туралы vesti.kz деректеріне сілтеме жасаған rast.kz хабарлайды.
Бүгін болып өткен 1/2 финалда Қазақстанның 6 боксшысы шаршы алаңға шықты. Олардың екеуі ғана жеңіске жетіп, алтын медаль үшін шайқасу мүмкіндігіне қол жеткізді.
Әуелі 48 килоға дейінгі салмақтағы Алуа Балқыбекова үндістандық Ниту Гангасқа ұпай санымен жол беріп қойды. Сөйтіп, қола медальды қанағат тұтуға мәжбүр болды. Бұдан кейін рингке көтерілген 57 килоға дейінгі салмақтағы Карина Ибрагимова әлемнің екі дүркін, құрлықтың бір мәрте чемпионы тайвандық Линь Юйтиннен басым түсті. Азияда қола медальдан артық жүлде алып көрмеген Каринаның бұл жеңісі сенсация ретінде бағаланды.
Келесі кезекте 66 кг салмақтағы Надежда Рябец қытайлық Ян Люден аса алмады. Оның да алар асуы қола медаль болып қалды. Сонан кейін австралияық Кейтлин Паркермен жұдырықтасқан Валентина Хальзова да жеңіліске ұшырады. Сол сияқты 81 кг салмақтағы Фариза Шолтай қытайлық Ван Линаға қарсы ұрыста артықшылық көрсете алған жоқ. Осылайша бұл екеуі команда қоржынын тағы екі қола жүлдемен толықтырды.
Финалдық жекпе-жекте өнер көрсету құқығын алған екінші спортшымыз 81 килодан ауыр салмақтағы Ләззат Күнгейбаева болып шықты. Ол әзербайжан Айнур Рзаева ұтты.
Ертең – финал. Барлық шайқастар кешкі сессияда, сағат 18:30-да басталады. Трансляция «Қазспорт» телеарнасынан тікелей эфирде көрсетіледі.
Суретте: Карина Ибрагимова
Сурет vesti.kz порталынан алынды
Ескерту!
rast.kz сайтының кез келген материалын редакцияның арнайы рұқсатынсыз көшіріп алып жариялауға тыйым салынады. Плагиат жасаушы «Авторлық құқық туралы» Заңға сәйкес қудаланады.
